Un pasku remarkabel,
House of Worship Hulanda ta invitá bo na un sirbishi di pasku online. Un momentu pa e famia bin huntu i rekordá nos Salbador Kristu Hesus. Lo tin baile, kanto, testimonio i músika. E sirbishi aki ta entitulá: “Who’s gonna tell them ”.
Sigui nos via livestream djabièrnè 24 di desèmber 2021 pa 13:30 di mèrdia via nos kanal di Youtube òf websait di House of Worship Hulanda.
Pa e sirbishi online aki nos a lansa diferente kansion kual nos ke kompartí adelantá ku boso. For di awe tur ta disponibel via radionan na Kòrsou, Aruba, Boneiru i Hulanda.
Título di e promé kansion ta “Mijn Gebed”, Kompositá pa: Chesron Richardson, interpretá pa Chanté Richardson i aregla dor di Wilmar Mook.
E di dos kansion ta “Emmanuel”, Dios ku nos. Esaki ta un kansion eksistente, di cover pa Proskuneo NL. Un bunita kansion di pasku. El a wòrdu kantá pa: Amirah Rijna, Chanté Richardson i Jeanine Richardson. E komposishon ta di Terrian Bass Woods i el a wòrdu programá dor di Jeanine Richardson.
E di tres kansion ta un klásiko di pasku “Oh come let us adore Him”. Den e kansion aki nos ta kanta di e grandesa di Dios. E kansion aki a wòrdu grabá “live” den iglesia House of Worship Hulanda. El a wòrdu interpretá dor di Tamara Nivilac i areglá dor di Proskuneo NL.
Nos no a lubidá riba nos Muchanan. Nan tambe ta kanta i selebrá e pasku aki ku e kansion “We vieren feest”. El a wòrdu kompositá dor di Michelle Macedo Sebastiao i e areglo ta di Jeanine Richardson. E kansion aki lo alegrá bo kurason.
I por último e kansion ku ta karga e selebrashon di pasku di nasementu di e aña aki: “Who’s gonna tell them” Interpretá pa Chesron Richardson, Franklin Martes, Chesron Justin Richardson i Jermaël Lanoy. Un komposishon di Marvin Winans i programá dor di Jeanine Richardson. Un kansion ku lo animá bo pa bai kompartí e amor di Dios ku abo a risibí.
Tur e kansionnan aki lo por wòrdu skuchá i mirá dia 24 di desèmber 13:30 via e kanal di YouTube di House of Worship Hulanda òf nos websait www.howhulanda.org. Un sirbishi online ku lo ta di bendishon pa un i tur.