Durante e reunion den Parlamento diaranson pa trata e Presupuesto Supletorio, Prome Minister Evelyn Wever-Croes a informa di e status di negociacionnan cu Hulanda pa loke ta trata recorte di salario y sosten di likides.
Prome Minister a duna di conoce cu Gobierno di Aruba ta den pleno negociacion cu Hulanda. Diabierna 17 di December lo tuma luga e Conseho di Minister di Reino cu ta uno hopi importante pa Gobierno di Aruba.
Den e reunion aki lo trata e sosten di likides pa Aruba pa e prome kwartaal di 2022. Tambe e ta un reunion importante pasobra ta bay atende cu e peticion pa ‘bouw af’ recortenan riba salario di empleadonan publico y semi-publico.
“E peticion ta pa bouw af, dus no mantene na e nivel ey pero bahe te pa por yega normalidad”, Prome Minister a indica.
Prome Minister a expresa cu e negociacionnan no ta facil. Dialuna ultimo a hiba conbersacionnan extenso riba e COHO, e nota di cambio, e nader rapport. Tur ta riba mesa di deliberacion cu Hulanda.
“Gobierno di Aruba ta optimismo cu e Conseho di Minister di diabierna. Algo por cambia di un momento pa otro pero nos ta na mesa ainda. E tema di e protocol ta riba mesa y ainda nos no a sali afor cu un fecha final pa nos por yega toch na e sosten di likides”.
Gobierno di Aruba a haci un peticion di sosten di likides di aproximadamente 80 miyon di cual un 30 miyon ta debe cu mester wordo paga. Esey no tin discucion riba dje, Prome Minister a bisa, pasobra tin palabracionnan haci cu Hulanda.
Ta resta un componente di 50 miyon cu tin mester den e prome kwartaal pa paga gastonan di Gobierno pasobra entradanan no ta mes halto cu gastonan ainda den e prome kwartaal di aña. E 50 miyon aki ta pa paga salario, percura pa enseñansa, nos sistema huridico y di salud y pa gobernacion en general.
Prome Minister a duna di conoce cu riba e 50 miyon, CFT ta conseha pa duna 12 miyon y no 50 miyon. CFT ta propone pa bin cu algun medida di impuesto, otro cortamento pa asina por yega na e diferencia pa yega e 50 miyon.
“Dus nos ta eynan ainda. Punto di salida di Gobierno ta cu nos ta sinta na mesa pa negocia pa asina yega na un meta comun”, Prome Minister Evelyn Wever-Croes a enfatisa.