Home Politics Parlamentario Marco Berlis (MEP):  E BENEFICIONAN ECONOMICO CU EAGLE LNG TA...

Parlamentario Marco Berlis (MEP):  E BENEFICIONAN ECONOMICO CU EAGLE LNG TA TRECE PA NOS PAIS ARUBA (PART-3)

SHARE

COSTO STABIEL Y OTRO IMPLICACIONNAN. E problema di Heavy Fuel Oil (HFO), diesel y productonan similar di petroleo, ta cu nan costo ta mara n’e prijs fluctuante di e bari di petroleo. E mercado di petroleo ta hopi instabiel y por subi of baha enormemente na cualkier momento pa via di diferente factornan y tendencianan global. Actualmente e prijs di bari di petroleo ta costa alrededor $73.70 pa bari. Esaki ta hopi halto y e tendencia aworaki ta mustra cu e lo por bira mas caro. Como pais nos ta specialmente vulnerabel pa cu e fluctuacionnan aki, pasobra e ta afecta e costo di awa y coriente di un forma directo. E ta den e cuadro aki LNG Gas lo haci un diferencia enorme. 

E contract di WEB Aruba NV cu Eagle LNG ta basa riba Henry Hub, cu ta e gas pricing index mas stabiel y transparente di mundo. Adicionalmente di e stabilidad di e commodity index, Eagle LNG a ofrece un prijs cu ta estableci pa mas o menos 67% di su balor total, haciendo e prijs di e LNG Gas entrega na WEB practicamente un liña stret y stabiel, pa loke ta e prijs y termino di e contract. E deal aki ta sigura nos pueblo cu nos no mester preocupa pa e otro mercadonan di Gas cu no ta stabiel. Adicionalmente LNG Gas ta 35% mas economico cu HFO, cual fuel WEB ta usando aworaki. Esaki ta un costo hopi mas abao di fuel, cu ta significa un costo di awa y coriente mas abao, cu ta un beneficio enorme pa nos pueblo. 

 

Den e dianan aki tabata tin hopi papiamento politico tocante di cuanto e deal aki ta bay costa Aruba. Pero loke oposicion no kier pa pueblo sa ta cuanto nos ta bay spaar cu e deal aki! Pais Aruba ta bay paga solamente pa e LNG Gas, cu ta hopi mas economico cu HFO. Ta wordo proyecta cu e deal ta bay spaar WEB Aruba NV y pueblo di Aruba aproximadamente $33.8 miyon of mas o menos 60 Miyon florin pa aña! Esaki por a wordo puntra na president di Eagle LNG pero esaki ta loke oposicion hamas kier pa pueblo scucha. 

 

Otro factor importante ta pa remarca cu Eagle LNG ta productor di e LNG gas. Esaki ta e motibo pakiko Eagle LNG por brinda nos pais un prijs hopi mas preferencial y economico, enbes di cumpra LNG Gas for di otro empresanan cu ta djis un mediador entre productor y cumprado. E momento cu bo ta cumpra directamente di fabrica, inmediatamente bo ta haya un prijs hopi mas faborabel. Ta pa e motibo aki nos ta aplaudi e iniciativa y logro di WEB Aruba NV y pais Aruba cu e logro grandi aki. 

 

Ademas LNG Gas no solamente ta 35% mas economico cu HFO, sino cu na e momento cu ta start e Recipnan cu lo wordo instala na Maart 2022, lo usa 800-900 bari menos pa dia compara cu HFO. E combinacion di e Recip nobo cu LNG Gas lo yuda baha gasto hopi mas ainda, dor di reduci e volumen y consumo di fuel. Esaki naturalmente ta traduci na un mihor prijs pa pueblo. Nos di fraccion di MEP y gobierno ta enfoca pa traha duro pa para tras di proyectonan manera esakinan cu lo trece alivio y progreso pa nos pais.