Awe nos ta tratando e presupuesto supletorio 2021, esta e cambionan riba e presupuesto cu Parlamento a aproba dia 30 di juli 2021.
E cifranan sigur ta duna un indicacion cu cos a bay mihor cu Gobierno a premira inicialmente. Nos deficit presupuestario calcula anteriormente a baha cu 189 miyon, dus di un deficit di 775 miyon pa 586 miyon. Esaki tabata posibel door cu nos gastonan a resulta menos y gobierno a genera mas entrada. E ultimo aki sigur ta refleho di e crecemento economico cu Aruba ta conociendo.
For di e cifranan nos por constata cu gobierno a premira un crecemento economico nominal di 10,9% na mei 2021 y den e pronostico di october 2021 esaki a keda hisa pa 13,6%.
No obstante e cifranan alentador aki, nos pais ta keda den un situacion hopi delicado. Nos recuperacion turistico ainda no ta na e nivelnan prome cu COVID-19, nos desaroyo economico sigur den e lunanan di december 2021 y januari 2022 ta mustra di lo ta uno hopi positivo, pero na mes momento nos mester tene debido atencion pa e desaroyonan mundial di COVID-19 y e variante nobo Omicron.
Pesey mes mi a cuminsa na pidi Gobierno pa duna un update encuanto e maneho di COVID-19 y kico lo ta tumando lugar a corto plazo mirando cu e desaroyo riba tereno di COVID sigur lo por tin un impacto grandi riba realisacion di e pronosticonan asina positivo riba tereno turistico y nos economia.
Pesey awe mi a pidi Gobierno pa e elabora entro otro riba e siguiente puntonan:
– Pa elabora encuanto e desaroyo y pronosticonan economico a corto y mediano plazo;
– Pa elabora riba e cantidad di cuponan di trabou cu ta spera lo keda crea di awor y den 2022 basa riba e desaroyo economico aki.
Otro aspecto cu sigur mi a haya na su lugar pa gobierno elabora riba dje ta e aspecto di negosacionnan cu Hulanda.
Mi tabata kier sa kico ta e situacion cu Hulanda y a pidi un update encuanto e negosacionnan.
Specificamente mi tabata kier sa di Gobierno si ta premira cu ainda nos ta bai haya sosten di likides pa e ultimo kwartaal di e aña aki ainda? Y con ta para cu e necesidad financiero pa loke ta trata kwartaal 1 y 2 di 2022? Y kico ta e plan B dado caso nos no haya e sosten aki?
Mirando e circumstancia rond di e discusion encuanto e 12,6% ainda hopi confusion ta keda crea door di politiconan oponente. Pesey mi a pidi Gobierno pa splica un biaha mas, pa di tanto biaha, encuanto esaki. Alabes a puntra Gobierno si Hulanda a contesta nan peticion pa halveer e recorte.
Sigur mi a para keto na e realidad di e situacion financiero di nos pais y cu ta rekeri pa nos actua responsablemente. Pasobra nos por ripara cu hopi no ta realisa kico lo ta e consecuencia si Aruba dicidi pa no sigui cumpli cu condicionnan mara na e sosten di likides di parti Hulanda.
Na e momentonan aki Gobierno ta contestando tur e preguntanan cu parlamemtarionan a haci durante prome tanda.