Home » Parlamentario Ricky Hoek (MEP): Eagle LNG, laga nos refleha! Ban wak a cosnan positivo!

Parlamentario Ricky Hoek (MEP): Eagle LNG, laga nos refleha! Ban wak a cosnan positivo!

by Admin
0 comment 55 views

 

 

 

Laga nos refleha, tanto nos di Parlamento di Aruba y nos comunidad henter. Laga nos refleha riba e dos dianan cu Parlamento di Aruba ta tratando e contract entre WEB Aruba N.V. y Eagle LNG.

 

Nos tin un proyecto grandi y importante nos dilanti, cual ta e proyecto di ‘Liquified/liquid Natural Gas’ (LNG). E proyecto aki tin beneficionan positivo pa nos ciudadanonan y futuro generacionnan. 

 

Prome cu nos bai den contenido di e proyecto, laga nos usa e comparacion di ora nos ta bai biaha. Nos tur gusta biaha y disfruta di un destinacion distinto. Nos ta planea nos biahe cu expectativa pa e ta un experiencia positivo, unico y di balor agrega na nos bida. Sinembargo, ora nos ta bai di biahe, nos no ta bai cerca e piloto y puntr’e pa su licencia di aviacion. Nos ta pone tur nos confiansa den dje, y confia cu e biahe ta bai bon y cu nos lo yega nos destinacion sano y salvo. Y na final di e biahe, nos por wak atras cu enberdad e proceso di planificacion, preparacion y di disfruta a bai bon. 

 

Asina tambe ta e caso den e proyecto di LNG gas, caminda nos ta confia cu nos expertonan y profesionalan a y lo tuma e miho decisionnan cu lo hiba na un proyecto exitoso y rendabel na final di dia. 

 

Awor, laga nos refleha riba e ultimo dos dianan. Nos a mustra di ta un Parlamento cu vision of un Parlamento cu ta djis duna critica destructivo? Nos a pone e interes general di nos pueblo nos dilanti y sostene loke ta bon pa nos tur?

 

Riba dialuna 13 di December 2021, nos tabata tin e expertonan tanto internacional como local den cas. Dicon ora cu e expertonan tey, no ta haci tur e preguntanan y kita tur duda riba e proyecto? Esaki ta un manera di traha eficiente? Nos a perde un bon oportunidad y en bes di enfoca riba contenido a kibra un vision inovativo. E oportunidad (cu tabata den forma di un Openbare Bijeenkomst (OB)/ Encuentro Publico) cu Parlamento di Aruba a haya, tabata uno sumamente importante. Den e OB aki, por a puntra riba e aspecto di seguridad, inversion, cual tecnologia lo usa, kico ta e aportenan adicional na nos pais. 

 

Un otro punto cu a sali dilanti ta e hecho cu ta parce cu nos no ta balora nos expertonan local. Nos tin yiunan di tera cu tin hopi experticio profesional riba diferente tereno y nos lo tin cu haci uso optimal di nan conocemento y profesionalismo. 

 

Kico e expertonan local aki tin di haber cu e proyecto di LNG gas entre WEB Aruba N.V. y Eagle LNG? Ta asina cu tabata tin un comision special cu a duna conseho pa asina yega na e contract entre e dos partidonan. Conforme e documento ‘Request for Expression of Interest (REOI)’ procedure , ta wordo menciona cu riba 23 di juli 2020 a forma un ‘Advisory Branch Committee’ cu netamente expertonan local pa duna conseho riba e proyecto di LNG. 

E comision tabata consisti di e siguiente expertonan local (kisas tin un of dos di experto internacional) cu e respectivo funcionnan (na ingles) cu ta entre otro: 

  • Chairman – Mr. R. Arends
  • Int’l Oil & Gas Expert – Dr. K. Gobert
  • Local Refinery Expert – Mr. E. Oduber
  • Legal Counselor – Mrs. M. Brown
  • Economic/Financial Expert – Ms. J. Briceno 
  • HSE Expert – Mr. R. Leonora

Adicional di e documento di REOI, tanto e expertonan local y e partidonan a consulta e investigacion ‘Unveiling the Natural Gas Opportunity in the Caribbean’ di aña 2019, skirbi pa Rigoberto Ariel Yepez-Garcia y Fernando Anaya Amenabar di e Inter-American Development  Bank. 

 

E investigacion aki ta mustra kico ta e beneficionan pa e uso di gas natural, e financiamento di dicho proyecto y cu un contract di 20 aña, manera esun cu WEB Aruba NV y Eagle LNG a cera ta algo comun. Esaki ta debi na e inversionnan grandi cu ta wordo haci y cu den termino largo por mira e ganashinan financiero tanto pa e companianan y pueblo en general. Mester remarca, cu WEB Aruba mes a cera un contrato di 20 aña a base di inversionnan anterior pa cu e motor RECIP-4 na Balashi pa bai over na gas natural. 

 

Mi a pidi mi coleganan parlamentario, ministernan y tambe comunidad pa refleha riba loke nos kier pa progreso di nos pais den termino largo. E proyecto di LNG ta beneficioso den termino largo riba e siguiente terenonan:

  • Labor: cu introduccion di e proyecto LNG lo crea alrededor di 100 cupo di trabou segun e fase di construccion y implementacion di e proyecto. 
  • Social: e proyecto LNG por contribui grandemente na mehoracion di nos situacion social. Por crea fondonan nobo caminda por inverti den nos poblacion riba entre otro tereno di sosten emocional psicologico, Vivienda pa nos grandinan.
  • Educacion: nos studiantenan di EPI Tecnologia, Sisstem di Universidad di Aruba y studiantenan di exterior por haci nan pasantia na e localidad/planta di LNG.
  • Inovacion: manera cu WEB Aruba NV a duna di conoce, nan lo bai over na LNG y despues pa pasa na hydrogen. Esaki ta brinda oportunidad di demostra cu Aruba ta canando un paso mas dilanti den region pa loke ta inovacion den LNG.
  • Economia: cu un inversion miyonario for di un compania internacional, esaki lo stimula e economia local pa atrea otro inversionistanan y tambe hisa e fluho di moneda local.
  • Medio ambiente: realisando e proyecto di LNG nos lo stimula nos pa sigui traha na e concientisacion y cuido di nos medio ambiente a largo plaso. 

Si nos refleha, y wak bon e proyecto di LNG, nos por bisa cu realmente nos ta trahando na e progreso y bienestar di nos pais!

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio