Nos por a wak den e ultimo dianan den prensa, riba e plataformanan social y dos dia di reunion publico, unda cu oposicion tabata kier a saca probecho di e opinion y peticion cu Sr.Parlamentario Raymond Kamperveen a bin ta expresa y lucha pe. A inventa un forma di narativa pa trata na sembra panico, duda y desconfiansa den e Proyecto di Eagle LNG cu WEB a firma algun dia pasa. E deal aki entre Eagle LNG y WEB NV, lo trece diferente beneficionan pa nos pueblo. Pero prome mi bay skirbi di esakinan mi kier a trece na cla algun di e mentiranan cu oposicion a usa pa manipula pueblo y trata na gana tereno politico.
E CONTRACT
E contract entre Eagle LNG y WEB Aruba NV ta un NDA. (Non-Disclosure Agreement.) Kico esaki kiermen? E kiermen cu e contract aki no por wordo mustra ni comparti cu ningun otro persona pasobra esaki lo significa cu inmediatamente e contract lo wordo kibra y e deal firma lo cay na awa. Esaki ta un practica hopi comun den e mundo di finanzas y economia. Y e no ta un secreto pa e coleganan parlamentario cu kier haci pueblo kere cu esaki no ta e caso. Ta exactamente e actitud aki ta sumamente lamentabel pero ainda mas condenabel, pasobra ta manipula y desinforma e pueblo intencionalmente pa trata na gana teritorio politico. Politiconan a para grita den prensa, riba plataformanan social y hasta den Parlamento cu kier wak contract sabiendo cu esaki no ta posibel, cu e unico obhetivo di agita y disgusta un pueblo cu ya ta pasando den un crisis economico cu Covid-19 a causa. E ta lamentabel ora cu politiconan den Parlamento usa nan posicion pa metanan politico, usando decepcion pa logra esakinan.
AVP MES A INSISTI NA 2018 PA NOS BAY OVER PA LNG GAS
WEB Aruba NV tin profesionalnan cu experticio cu hopi experiencia y a bin prepara WEB pa basta tempo caba pa loke ta trata e conexion cu LNG Gas. A inverti den Recip nobo, cu ta traha cu LNG Gas, cual WEB NV a cumpra pa mas di 200 miyon florin atraves di algun aña. Nos por wak e controversia den e politica di AVP claramente ora bo lesa un articulo cu nan mes a skirbi riba Augustus 4, 2018, AVP mes a insisti cu pais Aruba mester bay over na LNG Gas. Por wak e articulo aki riba nan website! Aki den ta splica den detaye cu nan tabata tin tur cos cla caba pa cuminsa esaki. Mi ta quote dos parti di e articulo aki cu ta bisa; “Nan tabata interesa pa traha hunto cu Gobierno di Aruba y Utilities y WEB, inverti si ta necesario, pues pa ta un partner den e proyecto. E proyecto a wordo ehecuta, tur e plannan a wordo traha, visibility studies y business plan ta traha.” y tambe; “LNG ta bon pasobra e tin su beneficionan operacional y tecnico, y financieramente. E tin su beneficionan sigur ora ta papia di emision di productonan dañino pa Medio Ambiente. Nos sa cu pasobra e ta un proyecto cu Gobierno anterior a traha riba dje y tabata full cla, nan (Gobierno Wever Croes-1) no kier ehecuta esaki. E ta lastima pasobra den cierto casonan, ora cu proyectonan ta bon, mester tin continuacion.” Awe nos por wak cu nos gobierno si a duna continuacion na e proyecto aki. Pero pasobra no ta AVP a haci’e, tur cos ta malo! Lesa e articulo aki na AVP.aw, click riba “Noticia,” y haci search; Pa WEB y Gasunie traha hunto. Lesa e articulo pa bo mes prome nan kite! Akinan nos por wak cu nan a haci tur analisis y plan, tabata sa tur detaye, beneficio y con esaki lo baha e prijs di awa y coriente! Y asina mes nos ta wak un biaha mas cu nan ta encontra y haci manera e Proyecto no ta bon! Saca bo propio conclusion. Lesa e articulo riba nan website bo mes y yega ne conclusion di oposicion su hipocrecia inmenso!