Despues cu nos por a wak un campaña fuerte di desinformacion di parti DI oposicion completo pa trata na stop y boycott e proyecto, ta mi obligacion pa presenta pueblo informacion y claridad di e deal entre Eagle LNG y Web Aruba NV, mescos cu WEB Aruba NV tambe a bin ta haci. Mi ta alaves masha contento pa a scucha diaranson mainta un entrevista exclusivo cu sr. Sean Lalani cu ta Presidente di Eagle LNG, hunto cu sr. Aldrich Croes di emisora Hit 100. Hopi informacion a wordo duna y por a scucha tur e contesta di tur pregunta. E entrevista aki tabata di vital importancia pasobra e ta trece na luz tur e beneficionan cu e deal entre Eagle LNG y Web Aruba NV lo trece pa henter e pueblo di Aruba. Ademas di esaki Sr. Sean Lalani a clarifica algun ponencianan eroneo cu algun colega den oposicion a maniobra cu ne den Parlamento. Esaki naturalmente ta lamentabel y ta desplega un falta di seriedad total pa cu e funcion di parlamentario y ta demostra cu di berdad ta politica ta hungando y no ta busca pa traha na e mihor interes di e Pueblo di Aruba. Ta pa e motibo aki mi ta publicando informacion pa pueblo por lesa pa nan mes y keda cu trankilidad di e beneficionan cu LNG Gas ta bay trece pa nos tur.
BENEFICIO PA NOS MEDIO AMBIENTE. Fraccion di MEP y gobierno di Aruba ta comprometi pa baha e carbon footprint y contaminacion di nos medio ambiente. E combinacion di 67% LNG Gas y 33% di energia renovabel aki na Aruba lo rebaha carbon footprint pa 53% aki na Aruba compara cu cu HFO, cual ta e fuel cu WEB Aruba NV ta usando aworaki. Comparando HFO v/s LNG (Excluyendo e combinacion cu energia renovabel), WEB lo ta reduciendo su emisionnan cu:
- 30% reduccion den CO2 emissions
- 75% reduccion den NOx emissions
- 99% reduccion den SOx emissions
- 90% reduccion den Particulate emissions – cu ta conoci pa ta esun di mas impactante pa calidad di bida y cu ta directamente asocia cu enfermedadnan respiratorio. Nos por compronde anto, con importante e ta pa nos elimina HFO y introduce LNG gas, specialmente den e un pandemia cu ta target nos sistema respiratorio sin misericordia.
Pa pone simpel pa tur hende compronde, LNG ta elimina e mayoria di emisionnan local y ta provee e caminda pa cero carbon emissions atraves di avancenan den technologia. Ta pesey e ta asina importante pa nos cambia di HFO pa LNG Gas cu ta mas economico, mas limpi y ta prepara e caminda pa mas forma di renewables por wordo introduci na nos pais. Di parti di nos fraccion y gobierno di Aruba nos ta sostene e deal aki cu simplemente ta bay ta un adelanto enorme pa combati e contaminacion di nos medio ambiente, set e tone pa crea mas renewables, baha prijs di awa y coriente y cu alaves lo asegura cu nos pueblo por respira un aire hopi mas limpi. E ta di vital importancia pa nos medio ambiente keda intacto pa nos futuro generacionnan por disfruta di un mihor Aruba cu ta di nos tur. Pesey LNG Gas ta e transicion fuel cu nos mester awor, pa asina Aruba por sigui avansa den e direccion corecto.