Home Politics Minister Maduro ta urgi e Directiva General di VWI vereniging di trahadornan...

Minister Maduro ta urgi e Directiva General di VWI vereniging di trahadornan cu contrato individual na WEB pa nan tambe forma parti di e Comision Financiero cu Gobierno ta propone

SHARE

Asina por haya kita nan duda den cifra di Gobierno y haya splicacion debido di finansa publico
ORANJESTAD – Minister Maduro a tuma nota di e comunicado di prensa di e bestuur di e VWI vereniging di trahadornan cu contrato individual na WEB den cual ta cuestiona cu tin 3 problema fundamental pa acepta pa sinta na mesa den e Comision Financiero cu Gobierno ta propone pa e sindicatonan forma parti di dje pa haya habri buki y mustra e situacion financiero di Pais Aruba. Na opinion di Minister Maduro ta un preocupacion VWI ta trece dilanti, esta cu e cifranan di Pais Aruba no ta confiabel. Y pa esaki nan a duna 3 ehempel pa cual e mandatario ta brinda un splicacion breve den e articulo aki.

Gastonan incontrolabel of parcialmente controlabel
E promer ehempel cu VWI ta trece dilanti ta saca fo’i pagina 30 y 31 di e Uitvoeringsrapportage di e tres kwartaal di 2021, URK3. Pa esaki mester remarca cu den e URK3 mes ta splica pa cual tipo di gasto e cifra ta controlabel y pa cual no y tambe ta indica cual ta e motibo cu esaki ta asina. Esaki ta informacion cu ta wordo compila pa Centrale Accountantsdienst Aruba CAD den cuadro di e ‘nulmeting’ cu ta wordo haci pa drecha e maneho financiero di Pais Aruba. Indicando cu e cifra no ta controlabel, no kiermeen de facto cu e cifra no ta bon of no ta sirbi. Hopi biaha tin di haber cu e proceso di administracion of proceduranan cu no ta bon describi. Y e motibo pakiko esaki no ta ‘up to date’ ta pasobra pa hopi aña caba tin falta di mas experticio financiero na CAD y Gobierno en general pa asina por haci e cambionan necesario. E no ta facil pa haya y mantene expertonan financiero den servicio di Gobierno debi cu no por competi cu e salarionan cu sector priva por ofrece na e expertonan financiero pa por haci e trabou necesario.

Disclaimer pa ‘voorlopige cijfers’
Den e di dos ehempel cu VWI ta trece dilanti, nan ta remarca cu Gobierno ta haci uso di un ‘disclaimer’ pa asina indica cu ta trata di ‘voorlopige cijfers’ y cu esaki ta saca conclusion cu Gobierno mes no ta sigur di e cifranan cu Departamento di Finansa ta produci. E conclusion aki no ta corecto. Tanten cu e aña financiero no cera, e cifranan por cambia. E ciclo presupuestario ta cera cu un cuenta anual. Te ora esaki keda compila, por presenta cambio den e cifranan. Esaki no kiermeen cu e cifranan no ta confiabel. Por remarca aki cu Banco Central tambe ta haci uso di disclaimer y e cifranan aki ta wordo usa local y internacionalmente pa CAFT, IMF, FITCH, S&P etc etc y no por djies saca conclusion cu e cifranan no ta bon of no ta di confia.

Ningun Cuenta Anual di Pais Aruba tin un aprobacion di un accountant independiente
Den e di tercer ehempel cu VWI ta trece dilanti ta indica cu Pais Aruba ainda no tin un ‘goedgekeurde accountantsverklaring.’ Esaki ta berdad y ta pesey hunto cu CAFT ta trahando pa por yega eynan. Ta pa e motibo ey tin ‘nulmeting’ ta wordo haci awor aki y den e URK ta wordo raporta riba e trabounan y avanse di esaki. E motibo pakico te ainda Pais Aruba no tin un aprobacion di un accountant independiente tin un splicacion tecnico cu den e Comision Financiero cu Gobierno ta propone na e sindicatonan por haya un debido splicacion cu tur detayes.

Gobierno ta bende Pueblo un 9 pa 6
Den e parti final di e comunicado VWI ta cuestiona e veracidad di e cifranan di Gobierno y ta tilda Gobierno di ta bende Pueblo un 6 pa un 9. Esaki ta hopi lamentabel pasobra ta expertonan Arubiano bon studia ta traha na bienestar di Aruba na entre otro Departamento di Finansa, Algemene Rekenkamer Aruba y Centrale Accountantsdienst Aruba riba e cifranan di nos Pais. Nan no ta traha eynan pa bende Pueblo un 6 pa un 9 of pa mal informa. E conclusion saca riba e expertonan aki no ta corecto y ta bolbe mustra e necesidad pa VWI y tur otro sindicato, forma parti di e Comision Financiero cu Gobierno ta propone pa evita mal comprondemento y mal interpretacion di e cifranan y informacion financiero di Pais Aruba.

Invitacion pa participa na Comision Financiero
Minister Maduro ta urgi VWI na bienestar di su miembronan y na bienestar di Aruba henter, pa haci uzo di e oportunidad pa forma parti di e Comision Financiero cu Gobierno ta propone na sindicatonan pa asina kita tur duda y haya splicacion debido di Aruba su finansa publico pa di e manera aki por forma un opinion mas balansa.