Kralendijk – E convencion di Dutch Caribbean Nature Alliance (DCNA) cu recientemente a tuma luga a corda participantenan cu naturalesa ta un negoshi enorme. Sin embargo, hopi no ta consciente di e diferente maneranan cu por hasi uzo di naturalesa pa crea crecemento economico duradero. Un di DCNA su metanan ta crea conscientisacion riba naturalesa su potencial.
Balor economico di naturalesa
Sra. Hellen van der Wal, presidente di directiva di DCNA, ta splica cu “naturalesa ta provee nos cu alimento y ta ofrec nos alternativa pa entretenimento y relahacion. E biodiversidad unico cu nos tin den Caribe Hulandes ta un fuente di atraccion pa turista cu ta biaha pa nos region netamente pa contempla e naturalesa aki.” Naturalesa ta forma e fundeshi pa tur actividad economico y di acuerdo cu World Wide Fund for Nature ta calcula cu naturalesa su contribucion na e producto interno bruto na nivel mundial tabata 125 biyon dollar na aña 2018.
Preocupacion tocante durabilidad
Mientras cu naturalesa ta ofrece oportunidad pa crecemento economico considerabel, DCNA ta kere cu un cresemento asina no por bai a costo di e patrimonio natural di e islanan di Caribe Hulandes. Pa por proteha nan biodiversidad unico, e islanan mester integra practicanan di desaroyo duradero den maneho y plannan di termino largo. Pa por logra esaki, naturalesa mester ta punto di salida den toma di desicion y den trahamentu di plannan strategico.
Aporte di DCNA
Durante e convencion cu recientemente a tuma luga na Corsou directiva di DCNA a renoba su compromiso pa intensiva esfuersonan pa crea mas conscientisacion tocante naturalesa su balor economico, particularmente bou di e gobiernunan di Caribe Hulandes. Tambe DCNA lo sigui envolvi e siguiente generacion den discucionnan tocante conservacion di naturalesa. Ta proba cu nan aporte ta di gran balor y p’esey tin un programa structural pa hoben.
Tambe DCNA lo sigui stimula y facilita investigacion sientifico, loke ta necesario pa nabega un futuro carga cu reto y diferente crisis, debi na cambio climatologico. Pa alcansa e metanan importante aki, DCNA lo sigui crea lasonan di colaboracion y recauda fondo. Esaki ta crucial, considerando e retonan cu a surgi como consecuensia di e pandemia.
Ainda tin hopi trabou pa hasi y p’esey colaboracion entre e seis islanan di Reino den Caribe ta di vital importansia. Sra. Van der Wal ta kere cu e convencion a logra fortifica relacionnan existente, pero tin hopi reto pa enfrenta ainda. “Cu cambionan importante den nos structura di maneho, nos ta ekipando nos mes pa por sirbi nos parkenan miho den nan trabou di conscientisacion y conservacion di naturalesa. Ademas, nos ke informa e respectivo gobiernonan di forma mas efectivo, p’esey nos lo sigui traha pa fortifica nos relacion y colaboracion cu tur gobiernoden Caribe Hulandes.” E ta termina enfatisando cu “no por papia di desaroyo duradero, sin papia di conservacion di naturalesa.”
Mas informacion tocante e convencion di DCNA ta disponibel riba pagina di Facebooc di DCNA: DutchCaribbeanNatureAlliance
Sra. Van der Wal guiando discucionnan importante durante e convencion di DCNA