Aruba ta habri dialuna cu un noticia hopi tristo, yiu a hinca y a tira su propio tata mata.
Rooi Bosal: Dialuna den careda di 2’or di marduga, Aruba a wordo sacudi cu un drama di famia. E homber J. Mathilda, a yega na Hospital cu su tata, kende tabata seriamente herida.
Segun nos a compronde lo a surgi un discussion entre tata y yiu, na nan cas na Rooi Bosal, e discussion lo a bay completamente for di man, na momento cu e yiu homber a dicidi di tira e tata, como si fuera esaki no lo tabata suficiente, e yiu homber a dicidi di hinca su tata tambe, lagando e seriamente herida.
Despues e mesun yiu aki, a hinca su tata den auto y a hib’e hospital, caminda un rato despues e tata a fayece, autoridad a detene e yiu mesora na hospital. Aparentemente lo ta trata di e conocido di polis. J. Mathilda.
Polis a bay na e cas caminda e drama a tuma lugar, e agentenan a tuma declaracion di e otro habitantenan y despues a pidi pa e departamentonan concerni pa haci mas investigacion. Slachtofferhulp tambe a wordo pidi na e sitio pa asina asisti e famia den nan dolor.
Relato Oficial di Polis.
CUERPO POLICIAL ARUBA TA INFORMA:
Jiu a tira y hinca su tata na Rooi Bosal.
02.00 melding a drenta via Central di Polis cu na un cas na Rooi Bosal un jiu lo a tira y hinca su tata
Na e jegada di patruya e personanan na e dicho cas a conta patruya cu enberdad un jiu cu ta biba den un appartement na dicho cas tawatin un discusion cu su tata y despues esaki elo a los un tiro den su direccion y despues propine un hinca.
E jiu mes a hinca e tata den auto y transporte pa hospital.
Departamento Tecnico di Cuerpo Policial, Recherche Santa Cruz (DAR4) y Slachtofferhulp a bay na e sitio.
Na jegada na hospital e homber no tawata duna señal di bida mas.
02.25 dokter a constata morto di e hende homber Eugenio C. Mathilda di 54 aña di edad.
Na hospital mes a detene e sospechoso J.M. y a transporte pa warda pendiente di mas investigacion.
Cuerpo Policial ta manda palabra di condolencia na e famia di e fayecido.
