Lider di partido di Pueblo Aruba, AVP, mr. Mike Eman, ta informa cu pa motibo di un preocupacion grandi pa cu e falta di transparencia cu Minister di Energia a demonstra den tratamento di e contract entre WEB Aruba N.V. y Eagle LNG, fraccionnan di AVP, MAS y ACCION 21 a pidi un Openbare Vergadering riba dia 8 di december 2021 na presidente di parlamente conforme articulo 23 di Reglement van Orde voor de Staten van Aruba. Un Openbare Vergadering ta un reunion cu ta ancra den nos Staatsregeling y nos Reglement van Orde voor de Staten.
Den un Openbare Vergadering tin posibilidad pa parlamento dicidi si e ta PRO of CONTRA e deal cu Eagle LNG. Tambe e reunion aki por desemboca den un moción di desconfianza contra di e Gobiero of e Minister. Señor Mike Eman ta splica cu p’esey Staten y en particular e partidonan di oposicion a keda sorprendi ora cu awe a haya “oproeping” pa un reunion den forma di un “Bijeenkomst”. Den un Bijeenkomst no tin posibilidad pa Staten dicidi si e ta PRO of CONTRA e LNG- deal. Tampoco un Bijeenkomst por desemboca den un mocion di desconfianza contra di e Gobiero of e Minister.
Aparentemente Gobierno y Presidente di Parlamento Edgard Vrolijk tin miedo cu si yama un Openbare Vergadering esaki por resulta den un mocion di desconfiansa contra e Minister di Energia. P’esey Vrolijk a laga yama un Bijeenkomst mientras e ta na Hulanda. Pero aki atrobe e ta viola nos derecho constitucional. Segun articulo 8 lid 2 di Reglement van Orde di Staten ta e Waarnemend-Voorzitter ta encarga ora Voorzitter no tey.
Esaki ta nifica cu Edgard no por duna ordo pa yama un Bijeenkomst si e no tey na Aruba. Señor Mike Eman ta splica cu e manera di procede di Edgard Vrolijk ta hopi grave pasobra di e manera aki ta viola nos democracia na unda parlamento mester por controla un minister manera debe ser y hasta mand’e cas si parlamento ta haya esey necesario. Ademas e procede aki ta mina nos estado di derecho pasobra ta pone nos Constitucion y e Reglement van Orde voor de Staten un banda pa yama un reunion cu no ta ancra den ningun ley y cu ademas no ta duna Parlamento e plataforma pa por actua cu autoridad.