Acuerdo energetico entre WEB cu Eagle LNG ta catalisador pa crecemento, prosperidad y mehoracion di medio ambiente pa Aruba
Oranjestad, Aruba – Eagle LNG Partners LLC (Eagle LNG), un compania mericano cu sede na Houston, Texas, y Jacksonville, Florida, a completa un contract di suministro di largo plaso cu WEB Aruba, e compania local di utilidad di energia y awa, pa establece un terminal na Aruba pa ricibi y pa regasificacion di gas likifica natural (‘LNG’).
E proyecto ta confirma e creciente importancia di Aruba como hub regional y ta crea pilarnan economico nobo pa e pais. Awe a confirma e acuerdo durante un ceremonia di firmamento cu asistencia di Minister di Labor, Energia y Integracion, Sr. Glenbert Croes, y Acting Chief Executive Officer di WEB Aruba N.V., Sr. S.J. Wever.
E terminal di LNG na Aruba lo fungi como terminal pa ricibi y regasifica LNG di WEB pa su planta di electricidad na Balashi. E terminal lo ta situa na Refineria di Aruba, un localidad industrial existente na San Nicolas, unda lo ricibi, almacena y regasifica LNG for di Eagle, cu suministro di gas natural na e planta di electricidad di WEB. Usando LNG pa genera electricidad ta haci uzo di e inversion existente di WEB den makinaria di combustibel dual, mehorando prestacion medioambiental y stabilisando tarifanan di combustibel na prijsnan historicamente abou, tanten cu esaki ta facilita introduccion di mas generacion electrico renobabel intermitente na e isla.
“LNG ta cuadra cu WEB Aruba su vision di produci na un manera mas limpi, mas berde y liber di fuel oil y nos ta percura pa yega na un desalinisacion di awa y produccion y suministro sostenibel di energia. Nos ta yama bonbini na LNG como un combustibel di transicion cu na largo plaso mester conduci na un mescla di 50% na fuentenan renobabel di energia y 50% na combustibelnan alternativo”, segun CEO interino di WEB Aruba, Serapio (Laty) Wever”.
Inversion den infrastructura ta mas o menos US$100 miyon na Aruba y lo crea te na 200 cupo di trabou local durante construccion, empleonan –altamente specialisa- di operacion cu training specialisa den capacidadnan critico, awor cu Mundo ta den un transicion rumbo pa un futuro neutral di carbono. E proyecto lo introduci energia economico y stabiel pa e isla y mehora su reputacion medioambiental. Door di cambia pa LNG for di fuel oil pisa of diesel, lo reduci na un manera significante e emisionnan nocivo: 30 porciento den CO2, 75 porciento Nox, 90 porciento den particula y 99 porciento den SOx.
Sean Lalani, Presidente di Eagle LNG, a bisa: “Nos tin un compromiso pa inverti den e area di Caribe y ta un honor cu nos a firma un convenio pa otro proyecto mayor di LNG, e biaha aki na Aruba. Hunto cu otro convenionan reciente den region Caribe, entre otro e terminal nobo na Antigua, esaki ta confirma Eagle LNG un biaha mas como partner confiabel pa gas natural den e region. E terminal di importacion di LNG lo resulta den energia mas responsabel pa medio ambiente y lo sostene e adicion di mas generacion renobabel, gastonan mas abou di operacion y mantencion y un suministro stabiel y historicamente barata di combustibel. Banda di e beneficionan economico y medioambiental, e transicion pa produccion a base di LNG lo fungi como catalisador pa pilarnan economico nobo na Aruba. Nos ta ansioso pa forma parti di Aruba pa hopi aña.”
“Gobierno di Aruba ta yama Eagle LNG bonbini como suministrador pa WEB Aruba”, Sr. Glenbert Croes, Minister di Labor, Energia y Integracion, a bisa. “E ta un proyecto sumamente importante pa un Aruba cu ta stima su medio ambiente, cu lo produci energia a base di engeria limpi cu lo baha prijs di awa y coriente na beneficio di henter Aruba.”
Embahada di Merca na Curaçao a duna sosten den un fase trempan pa e proyecto na Aruba a traves di e programa di promocion di US Commerce Department, cual ta stimula exportacion mericano y alabes ta brinda consehonan tocante con pa haci negoshi den un pais stranhero.
—
Tocante Eagle LNG
Eagle LNG ta un compania di portfolio privadamente maneha y opera di The Energy & Minerals Group. Eagle LNG ta ofrece energia economico, eficiente y di kimamento limpi. E compania ta desaroya solucionnan pa combustion di LNG na escala chikito pa industria marino y generacion di electricidad den Caribe y Latino America. Eagle LNG tin su sede na Houston, Texas. Pa mas informacion, por fabor bishita www.eaglelng.com y www.eaglelng.com/aruba.
Tocante Utilities Aruba/WEB Aruba
Na 1990 Gobierno di Aruba, como accionista unico, a funda Utilities Aruba N.V., cu a bira e compania holding pa produccion y distribucion di tanto electricidad como awa. Utilities Aruba N.V. ta actua como enlace entre Gobierno y entidadnan di trabou. Na 2009 Gobierno di Aruba a desaroya un vision nobo cu un strategia nobo pa su companianan di utilidad. E vision aki, anuncia durante e conferencia Rio+20, a bira Aruba su punto di lansa principal y e rol principal di Utilities Aruba N.V., esta pa tuma un papel di liderazgo den supervision di e transicion energetico. https://www.facebook.com/webaruba/