ORANJESTAD – Tabata riba 10 di december 1948 unda Paris tabata e cede di un evento historico. Representantenan di diferente background legal y cultural di tur parti di mundo, a crea un documento importante den e historia di humanidad y di derecho humano.
Asina Nacionnan Uni den su Asamblea General resolucion 217-A a proclama e Declaracion Universal di Derecho Humano como un logro colectivo pa tur persona y nacion. Historicamente e ta marca pa prome biaha cu e derechonan humano fundamental, a keda protehi. E Declaracion Universal di Derecho Humano ta consisti di un preambulo (introduccion) y 30 articulo. E la wordo traduci den mas di 500 idioma y a inspira y habri caminda pa mas cu 70 otro tratado di derecho humano.
E aña aki Dia di Derecho Humano su tema ta “Igualdad, reduci desigualdad, promove derecho humano”. Y e tema ta relata na articulo 1 cu ta bisa “Tur ser humano ta nace liber y igual den dignidad y den derecho. Nan ta dota cu rason y cu consenshi y nan mester comporta nan den spirito di fraternidad pa cu otro”.
Pues, si nos mira bon, articulo 1 ta e base di e derechonan. E ta bisa cu tur hende ta igual den dignidad y derecho. Esey kiermeen cu tur hende, sea homber of muher, chikito of grandi, di cualkier rasa ta igual na otro y ta gosa di e mesun derechonan.
Ademas, articulo 1 ta bisa cu un persona ta nace cu rason y consenshi. Den transcurso di su desaroyo e persona ta siña rasona y tambe usa su consenshi. Esakinan ta hermentnan hopi necesario pa tuma e decisionnan corecto y pa tin un actitud habri y positivo den bida, na trabou, na cas y en general.
E ultimo parti di articulo 1 ta papia di nos comportacion den e spirito di fraternidad pa cu otro. Actualmente mundo y nos isla tambe ta pasando den un pandemia cu ta afecta nos pensamento y actitud. E situacion ta trece duda, miedo, incertidumbre laboral y financiero. Hopi ta esnan cu a bira victima di e efectonan di e pandemia. No obstante e situacion dificil y di un reto grandi cu hopi di nos ta biba aden, nos mester mantene e spirito di fraternidad. Corda riba e otronan cu ta pasando den un of otro forma di dificultad, cu ainda no tin trabou, cu a perde un familiar of simplemente cu ainda ta den recuperacion fisico of mental.
Ta falta solamente 15 dia pa Pasco y 21 dia pa un aña nobo. Pesey, den e temporada aki caminda cu union entre famia, amistad, colega, bisiña y ciudadanonan ta crucial, ta hopi importante pa nos manifesta e spirito di fraternidad. Usando bon rasonamiento y nos consenshi, nos lo realisa cu den union fraternal nos pais lo sa di progresa.