Aruba Native por a compronde cu B.K. a tira e homber K. cu un calco den cabez pasobra K. a bay riba dje cu un machete. Fiscal ta considera esaki maltrato cu arma y no defensa propio. Hues su decision ta cu e forma di reaccion di B.K. riba e homber K. cu tabatin un machete, ta un defensa propio y a declara B.K. liber.
Durante tratamento di e caso Hues a puntra B.K. si ta berdad cu el a dal K. cu un calco den cabez. Segun B.K. el a tira K. cu un calco. El a bisa Hues cu el a haci asina pasobra K. a bay cu un machete riba dje. Hues a bisa cu for di e investigacion di Polis por compronde cu tabatin un problema entre B.K. y K., kende ta e padastro di yiu di B.K. Esaki sosode den oranan di anochi y segun B.K., K. a dale cu mokete den boca. El a core bay den su auto pero e auto no kier a core. El a mira K. ta bin cu un machete den su direccion y e ora ey el a sali for di e auto, coy un calco y tira esaki riba K.
B.K. a bisa Hues cu e tabata sinti su mes amenaza y pesey a tira K. cu e calco. Hues a bisa cu e ex partner di B.K. a bisa cu B.K. a dal K. cu e calco. B.K. ta para riba cu el a tira K. cu e calco.
Fiscal a bisa Hues cu e homber K. a haci denuncia contra B.K. E ta haya legalmente proba cu B.K. a tira K. cu un calco. Fiscal no ta haya cu por papia aki di defensa propio manera B.K. ta bisa. Na opinion di Fiscal, tabatin un pelea cu despues a resulta den maltrato cu calco. B.K. ta bisa cu K. a bay riba dje cu un machete y B.K. a tir’e cu un calco. Fiscal a bisa Hues cu K. tabata kier a coy un machete pero no a logra esey. Pesey no por papia di defensa propio. El a bisa cu B.K. tin suerte cu tur cos a sali di bon. Fiscal a exigi castigo igual cu loke B.K. ta sera caba, esta 86 dia.
Hues a sera tratamento di e caso y a dicta sentencia di biaha. Hues ta haya B.K. kier a bay for di e cas pero tabatin problema cu e auto. Entretanto K. a sali pafor cu un machete. Na dado momento B.K. a tira e calco riba K. Hues ta haya K. a wordo herida door di e calco. Hues a sigui bisa cu e pregunta ta si esaki ta defensa propio. Na opinion di Hues, e hecho cu K. tabatin un machete, B.K. tabata sinti su mes menaza. E forma di reacciona di B.K. por wordo considera defensa propio y pesey no por castiga B.K. Hues a declara B.K. liber.