Diasabra ultimo dia 27 di november a tuma lugar e di 22 Annual Charity Golf Tournament organisa pa Rotary Club Aruba. E aña aki un biaha mas e team dinamico di Rotary Club Aruba a kibra tur expectativa na unda a recauda mas di Afl. 115,000,-. Rotary Club Aruba ta sumamente contento cu e logro aki teniendo na cuenta cu ainda nos ta den un pandemia. Tur fondo recauda lo bai bek na nos comunidad. E exito aki no tawata posibel sin e sosten continuo di nos “Platinum Sponsors”, cual ta Caribbean Mercantile Bank y Aruba Airport Authority E evento a tuma lugar na e prestigioso golf course di Tierra del Sol y Rotary Club Aruba a conta cu un total di 120 hungador di golf cu a participa.
Despues di e torneo a continua e actividad cu un tremendo dinner y premiacion. E team ganador a resulta e team di Zipotaso cu tabata consisti di Randolph Arends, Eddie Rivera, Hunt Riley y Gerlad Sarmiento. E team ganador a ricibi un premio cortesia di Digicel, y alavez e trofeo rotativo “Gerald Luidens”. Na di dos lugar y cu premio cortesia di Boolchand’s a keda e team di CMB cu tabata consisti di Paul de Wolfe, Warren Stanley, Rick Ingrassia y Marc Charley. E team di Diamante cu tawata consisti di Jim Morrison, Bill Wetmore, Jack Purves y Jim Kassam a keda na di tres lugar y a ricibi premio cortesia di AMC Unicon. E ganadornan di “closest to pin” tawata Javier Geerman (# 3), Jane Muir (# 7), Jack Purves (# 13), Greg Croeze (# 15) y Cliff Starke (# 17).
E atraccion un biaha mas tabata e Ball Drop, unda cu tur presente por a cumpra un bala di golf asigna na nan nomber. Durante e anochi, cu ayudo di Zen Designs, esakinan a wordo laga los riba Hole # 9. Esun cu a logra e closest to pin den e atraccion aki a gana un botter di Johnnie Walker XR 21 cortesia di Romar Trading.
Ademas di esaki tabata tin e tradicional rifa cu a conta premionan actractive cortesia di nos companianan local.
Tambe a tene un mini-auction, cu diferente pakete atractivo. Pa medio di e actividadnan aki, e mesun participantenan a haya un oportunidad pa hasi nan contribucion adicional.
Presidente Frederick Nuboer a keda masha contento y satisfecho cu e fondo recauda un biaha mas e aña aki. Esaki ta danki na e trabao duro cu e comite organisador ta hasi. “Mi ta hopi orguyoso di e team aki cu un biaha mas a bin cu ideanan creativo y atractivo pa asina toch organisa un evento exitoso, apesar di tur e reto nan”. Miembro Ravee Nandwani cu a lidera e comite organisador ta sigui na gradici tur e companianan cu a yuda Rotary e aña aki atrobe cu nan sponsorship. “Tur esaki ta hasi posibel pa Rotary Club Aruba sigui yuda esnan di mas necesidad den nos comunidad”.
A parte di e “Platinum Sponsors”, Rotary Club Aruba kier a gradici e “Premium Sponsors”, Tierra Del Sol, Elite Productions, Compra, Caribbean Overseas, Divi Resorts, Romar Trading y Zen Designs pa nan aporte. Un gradicimento ta bai pa nos “Silver Sponsors” Ennia, Juan Valdez, Guardian Group Fatum, Better Homes N.V. y AFAS Caribbean.
Tambe kier a duna un danki na e “Hole Sponsors”; Glitz Casino, New India Assurance, Botica di Servicio, ASD, Eagle Aruba, AIB Bank, Bossi Security, Hoevertsz ArchiDesign y Domino’s Pizza. Un gradicimento ta bai tambe na Ultimate Automobiles y BMW cu un biaha mas a patrosina e posibilidad di un “Hole-in-One”.
Un danki special ta bai na e patronisadornan riba e area di F&B, cu sin duda a contribui na un experiencia completo durante y despues di e evento.
Rotary Club Aruba kier a gradici un y tur cu e aña aki un biaha mas a deposita nan confiansa den e torneo aki. Na tur miembro di e comite organisador di Rotary Golf y tur otro miembro di cu di un of otro manera a duna nan sosten, contribuyendo na un evento exitoso. Nos ta spera di conta cu boso sosten atrobe na 2022 pa e di 23 edicion di Rotary Annual Charity Golf Tournament.
