Home Politics Segun Booshi Wever: ATROBE UN SILENCIO HERMETICO Y YEN DI SECRECIA...

Segun Booshi Wever: ATROBE UN SILENCIO HERMETICO Y YEN DI SECRECIA DEN UN CONTRACTO MIYONARIO!

SHARE

 

 

Ainda ta rezona den nos horeanan e palabranan di lider di MEP despues di eleccion anochi, cu gobernacion ta algo serio y cu tin hopi retonan cu mester wordo atendi mas pronto cu ta posibel. Pesey e ta kere ta necesario pa bin un gobierno nobo mas pronto cu ta posibel, y no por bay den negosacionnan largo.

Mientras cu nengosacionnan tabata andando riba un gobierno nobo, mas bien riba reparticion di cartera y no mucho riba e programa di gobernacion, e Minister responsabel pa WEB, esta e Prome Minister di Aruba demisionario, a permiti desaroyonan tuma lugar, manera core cu director y ponemento di su mesun swa como director temporal y continuacion di negosacion cu Eagle LNG. Y cada vez e ta bin bisa cu e no sa di nada, y cu e no ta mete den compania estatal, pa evita conflicto di interes. “A otro perro con este hueso”!, ya cu su director, su swa, ta un di e conflictonan di interes mas grandi. Despues nos a haya e badabada di director di Utilities, cu ta casa cu un coordinador y famia di e Prome Minister. NEPOTISMO den ultima forma!

 

Por a scucha di desaroyonan cu  tabata tumando lugar entre tanto, te cu e bin un gobierno nobo, na unda e cartera di Energia, ta bay pa minister Glenbert Croes. E desaroyonan a bay den un  asceleracion grandi, mientras cu tabata uza e pretexto pa yega na un acuerdo, e famoso cumbre di Glasgow riba medio ambiente. Minister Croes a bin dilanti bisa cu awo ta e momento cu Aruba por bay cumpli cu loke ta wordo pidi na Glasgow. Mientras cu ta trata di un topico cu sigur e minister Wever di Desaroyo Duradero  tambe mester tabata envolvi, pero parce, si nos wak e preguntanan lanza mas di un luna pasa y e reaccion awe di e parlamentario di RAIZ, esta sr. Kamperveen, nos ta puntra nos mes, te con leu e ministernan di partido MEP di e gabinete actual ta involviendo nan compañeronan di coalicion den asuntonan asina importante manera ta e cuestion di LNG aki, cu ta wordo cera pa 20 aña. Un falta total di TRANSPARENCIA!

 

Nos por mira un secrecia total, actornan cu tur ta famia di otro cu ta responsabel pa e deal aki, y falta di respet pa propio parlamentarionan, e duda cu tabata existi den e caso aki, ta bira mas fuerte, si no tin dealmento cu propiedad di nos pueblo, Patrimonio di nos pueblo.

Mientras cu riba facebook un parlamentario di coalicion ta sclama cu e no a haya splicacion riba su preguntanan, y cu ta cuestion e mentalidad “mesquino” cu tin bou integrantenan di goberno, minister Glenbert Croes ta declara cu e mes no a wak e contrato ainda. INSOLITO! Y toch awe tabata cla pa firma e contrato di 20 aña cu Eagle LNG.

E falta di presencia di e dos ministernan di RAIZ, cu pa nos mester tin algo di bisa, esta esun di economia y desaroyo sostenibel, mescos cu e esun di integridad y medio ambiente, ta pone hende pensa cu asuntonan no ta “koek en ei” entre e dos partnernan di coalicion! Pa colmo Minister Glembert Croes ta sali awe tambe bisa cu tin un diferencia di opinion entre e y RAIZ. Pero esaki no ta un simpel diferencia di opinion. Ta trata aki di un contrato cu lo bay costa pueblo pa adaptacionnan cu WEB mester haci rond di 40 miyon florin, mientras pa 20 aña largo 80 miyon dollar mester wordo paga na e compania Eagle LNG. Si den oposicion partido MEP a critica fuertemente e “HEDGING” di algun aña cu a tuma lugar bou di AVP, dicon awor a guli manda abou un hedging di 20 aña largo??? Ta realistico pa den un era cu ta buscando tur sorto di tecnica NOBO  pa produci energia cu no ta basa riba fossiel, awor ta sera un contrato di 20 aña pa LNG, cu ta mara nos tambe cu otro adaptacionnan of tecnologia lo no por uza? A scucha e expertonan di compania WEB mes den e caso aki?

 

E contrato cu minister Glenbert Croes ta papia di dje, ta mescos cu e contracto fabuloso cu CITGO di 2000 pagina cu Glembert Croes tampoco e no tabata sa e contenido, pero toch ela haye mihor cu e contracto di Coastal? Y pa colmo a vota na fabor y a hunga heroe cu ta e a logra e deal corupto aki cu su “hermanos chavista”!

Firma algo sin sa e contenido ta INTEGRO? Na unda e TRANSPARENCIA a keda? Parlamento no a wordo tendi? Nos Parlamentarionan cu ta papia di cambio, tin di sinta yora cu mester warda 35 aña atrobe? Ta asina ta brinda bo votadornan como parti di e pueblo aki e confianza deposito den bo? Of ta crea e ambiente di paniek, pa hustifica cu “NOS no ta NAN”? Lo pasa cu ne, mescos cu a pasa cu e defensor mas grandi di Canabis aki na Aruba, unda a menasa hopi pero a keda colga na e gabinete, Dios sa pakico??? A cambio di kico ta guli manda abou asina hopi asunto cu ta cai bou di e categoria di MAL GOBERNACION! Ki dia e minister di Integridad ta cuminsa actua?

 

Miembro di Partido UPP

Booshi Wever

9 di december 2021