Conhuntamente cu e grupo di San Nicolas Business Association (SNBA), Conseho di Minister a tuma luga na Nicolas Store diamars ultimo. Prome Minister Evelyn Wever-Croes a expresa cu e intencion ta pa Gabinete Wever-Croes II sigui cu e tradicion aki den e periodo di gobernacion nos dilanti. Tur Minister tawata presente na unda cu varios inversionista interesa den e desaroyo pa San Nicolas a duna presentacionnan hopi interesante di proyectonan grandi, mediano y chikito cu sigur lo trece desaroyo hopi importante pa Aruba y pa San Nicolas principalmente.
Prome Minister Wever Croes
Chef Darwing a presenta un proyecto hopi interesante cu ta consisti di un planta di procesamento di producto alimenticio manera: saus, vinaigrette y dressing. Un presentacion hopi amplio di e productonan cu e ta desaroyando.
‘Mi ta sumamente contento cu e resultado di e reunion y reaccion di Gobierno. Ta spera cu tur cos sigui positivo, señor Darwing a expresa.’
Pa Gobierno di Aruba desaroyo na San Nicolas ta necesario y importante pa henter nos pais. E proyectonan cu a wordo presenta e diamars mainta ta sumamente interesante y tur ta prometedo pa trece desaroyo economico nobo, grandi y hopi interesante pa San Nicolas”, Prome Minister Evelyn Wever-Croes a duna di conoce.