E aña aki ta pa di 31 biaha cu e Handelsmissie y Congreso Interexpo ta keda organisa. E aña aki e tin como tema: 10 aña despues di desmantelacion di Antiyas Hulandes.
E congreso a habri awe 8 di december 2021, ta continua mañan dia 9 de december 2021 y ta tuma lugar den e Centro di Prensa di Nieuwspoort na Den Haag. Interexpo tin 31 aña organisando misionnan comercial y congreso caminda representantenan di gobierno, parlamento y empresa y organisacionnan den Reino por reuni cu otro pa intercambia idea riba entre otro inversionnan na e islanan y trata topiconan di interes y di importancia. Inicialmente e congreso mester a tuma lugar na december 2020, pero desafortunadamente e mester a keda posponi debi na e pandemia di corona.
E biaha aki e congreso ta brinda e oportunidad pa participantenan por reflexiona riba e realidad politico di 10 aña despues di e desmantelacion di Antiyas Hulandes.
Practicamente mayoria partido politico di e diferente islanan ta participando y miembronan di Eerste y Tweede Kamer. Pesey mes durante e dia di awe mi a haci uso di oportunidad di papia y intercambia cu Coleganan den Reino caminda toch bo ta ripara cu e enfoke di tur combersacion ta riba COVID, nos retonan y con ta bay recupera.
E conferencia ta keda dirigi pa Mr. Jeroen Recourt. Awe nos tabatin diferente orador cu a trata diferente topico relaciona cu Reino Hulandes y den e perspectiva di despues di desmantelacion di Antiyas Hulandes. Sigur topico manera nos statuut (si e ta di e temponan aki, si e ta necesario etc.) pero tambe nacionalidad y ciudadania den Reino, pone e hende central den Reino y crea un Reino circular tabata topiconan hopi interesante y ta pone ami realisa cu ta keda na cada un di nos como politico pa aporta na crea e union cu nos kier.
Como Parlamentario p’ami ta sumamente importante pa crea y sigui mantene contacto den Reino y alabes sigui amplia mi conocemento di Reino. Mi ta ripara cu hopi biaha esnan cu mester tuma decisionnan hopi importante cu ta concerni nos isla hopi biaha no conoce nos situacion berdaderamente of no ta compronde esaki bon. Pesey e actividadnan asina aki ta crucial pa crea e relacionnan aki riba menciona cu ta asina importante pa e posicion di nos pais den Reino.
