Home » Nos Ke Boneiru Bèk: Kier pa Pone Boneiru (bèk) riba e Lista di Teritorionan-Sin-Propio-Gobernashon di Nashonnan Uní, ta informá di un kambio den su konstelashon

Nos Ke Boneiru Bèk: Kier pa Pone Boneiru (bèk) riba e Lista di Teritorionan-Sin-Propio-Gobernashon di Nashonnan Uní, ta informá di un kambio den su konstelashon

by Admin
0 comment 66 views

Nos Ke Boneiru Bèk (NKBB) a start desde 2016 ku e trayektoria internashonal pa pone Boneiru bèk riba Lista di Teritorionan-Sin-Propio-Gobernashon di Nashonnan Uní i e último sinku(5) añanan a persistí i di un forma determiná a logra na fin di aña pasá e investigashon/assessment internashonal ku ta rekonosé, akreditá, i usá pa Nashonnan Uní. NKBB ta kanando e mesun trayektoria i a kontratá e mesun grupo di eksperto ku Polynesia Franses a usa pa a logra bai bèk riba e lista di Nashonnan Uní na 2013.

 

NUKEB, esta e Komité Ehekutivo pa Pone Boneiru (bèk) riba e Lista di Teritorionan-Sin-Propio-Gobernashon di Nashonnan Uní, ta informá di un kambio den su konstelashon. 

 

Manera nos tur por kòrda, dia 27 di novèmber 2020 NKBB a lansa ofisialmente e Komité NUKEB, ku ta konsistí di dos ala, un ala síviko-sivil i un ala polítiko. 

Despues di lunanan di trabounan intensivo, e dos alanan di Komité NUKEB ta bin realisá ku nan no por haña otro riba e punto ku ta e parti síviko-sivil-aktivista NKBB i James Finies lo tin ku sigui mantené e timon i sigui liderá e trayektoria poko kompliká akí.

Debí na esaki e seis miembronan / organisashonnan ku ta forma NUKEB, di un forma natural a yega na e siguiente akuerdo pa loke ta kontinuashon di Komité NUKEB: e organisashonnan polítiko lo sigui nan ruta / trayektoria polítiko lòs for di NUKEB, miéntras ku e organisashonnan síviko-sivil lo sigui komo Komité NUKEB, ku su meta pa defendé pueblo boneriano su derecho di outodeterminashon i pone Boneiru bèk riba lista di Nashonnan Uní . 

 

Pueblo di Boneiru mester bira konsiente di e relashon-di-poder ku gobièrnu di Hulanda tin ku nos komo hende lokal i nos isla i ku tanten nos no bai riba e lista di Nashonnan Uní i gobièrnu di Hulanda no tin ku duna kuenta i rason na Nashonnan Uni i komunidat internashonal, gobièrnu di Hulanda lo no respetá e pueblo di Boneiru i su derechonan.

 

Ningun polítiko ni gobièrnu lokal – sigur despues ku e gobièrnu lokal mes a koperá pa gobièrnu hulandes hinka e pueblo boneriano kontra su deseo i ilegalmente den Konstitushon Hulandes, sin derecho igual – no por realisá nada sin ku gobièrnu di Hulanda ke. Ku otro palabra: ta lokual ku gobièrnu di Hulanda ta dikta lo mester sosedé, sea boluntariamente o bou di menasa, loke ta e kaso e último añanan i ku tur e islanan di èks-Antia ta eksperensiando. Tene na bista e situashon di Sint Eustatius, kon fásil Hulanda a drenta i tumba nan gobièrnu demokrátikamente elegí i e situashon ei a keda asina te ku awe. Meskos tabata e kaso na Boneiru kaminda Hulanda a forsa un vershon similar di outoridat i supordinashon dor di imponé un programma-manager riba e gobièrnu lokal.

 

NUKEB lo kontinuá e lucha i trayektoria for di e ángulo no-polítiko, esta e ángulo síviko-sivil  i lo sigui akshoná komo aktivista di derechonan humano i di outodeterminashon, tantu lokal komo riba tereno internashonal, te na momentu ku Boneiru ta bèk riba e Lista di Teritorionan-Sin-Propio-Gobernashon di Nashonnan Uní.    

 

NUKEB su parti síviko-sivil ta deseá e partidonan polítiko FSP, URB i 1UPP, huntu ku nan lidernan Robby Beukenboom, Suzy Thode i Aljano Emerenciana, tur klase di éksito pa futuro. Ku e simia di union plantá por krese bira un union polítiko sólido ku lo perdurá. 

 

Kontrario na rumornan eróneo, organisashonnan síviko-sivil manera Nos Ke Boneiru Bèk (NKBB) i Bonaire Human Rights Organisation (BHRO) no mester di polítikonan lokal, gobièrnu lokal ni gobièrnu hulandes, debí ku pa pone Boneiru bèk riba lista di Nashonnan Uní, ta desishon di komunidat internashonal via di Asamblea General di Nashonnan Uní i ta basá riba e resultado di un investigashon/assessment. Den kaso di Boneiru, e investigashon/assessment a determiná ku e relashon i situashon di Boneiru ta kai leu bou di e standart mínimo, di akuerdo ku Nashonnan Uní i lei internashonal. 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio