ORANJESTAD, ARUBA – Fundacion Parke Nacional Aruba (FPNA) ta den un proceso di consulta pa Parke Marino Aruba. Esaki a cuminsa cu diferente publicacion den prensa y media y 10 anochinan informativo pa publico durante lunanan di september y october na diferente localidad y online pa introduci e situacion actual di Parke Marino Aruba y e proceso di consulta. Tambe tin un encuesta andando tocante e 4 MPAs. Pa e prome sesion interactivo luna pasa, FPNA a invita personanan y instancianan clave pa participa pa duna un prome bista riba e perspectivanan di tur ramo riba e situacion actual di Parke Marino Aruba y e deseo pa futuro.
E prome sesion interactivo a tuma lugar unda un total di 64 participante a contribui na un SWOT-analisis den un forma interactivo. Un SWOT-analisis ta un analisis situacional di Parke Marino Aruba. Pa percura pa e seguridad y salubridad di tur participante a parti e grupo den dos pa e sesionnan. Cada grupo a participa den un sesion di 2 dia intensivo unda e participantenan hunto a delibera e aspectonan fuerte, debil, reto y oportunidad pa cada area MPA di Parke Marino Aruba. Den cada grupo tawata tin 6 pa 7 mesa cu representantenan di diferente ramo relata cu Parke Marino Aruba, manera: naturalesa, comunidad, autoridad, piscado y turismo. Cada mesa tambe tawata tin un facilitador, cual tawata studiantenan di IPA Movecion y Salud, cu por a duna e grupo guiansa pa por discuti y yega na resultadonan den un manera structura.
Despues di e analisis situacional pa identifica e aspectonan fuerte, debil, reto y oportunidad pa cada area MPA di Parke Marino Aruba, cada grupo tambe a delibera solucion y accion pa por uza e aspectonan fuerte y oportunadadnan mientras ta minimalisa e debilidad y retonan. Esaki a keda presenta pa e resto di e grupo den e sesion. Despues a finalisa e dos dia cu un ehercicio pa formula e vision 2030 pa nos bida marino.
Cu e gran cantidad di contribucionnan di e participantenan, FPNA ta trahando duro pa procesa tur e informacion pa asina por publica y presenta e resultadonan na januari 2022. A base di un prome bista riba e resultadonan ya caba por indica cu tur ramo ta preocupa pa e estado actual di nos areanan marino y cu tin un deseo pa mehoracion. A sali diferente sugerencia pa crea oportunidad pa asina tin un balanse entre uso di areanan marino y tambe tin espacio pa nos bida marino por recupera. Asina a bin dilanti diferente projecto pa restaura coral, yerbe di lama y mangelnan, sondeonan y investigacionnan necesario pa por determina e estado actual y solucionnan miho, programanan y projectonan educativo pa conscientisacion y e necesidad pa regula of zonifica actividadnan humano pa minimalisa e impacto.
A base di e resultadonan di e sesionnan interactivo cu lo publica y presenta na 2022 hunto cu e resultadonan di e encuesta, lo sigui pa un siguiente sesion interactivo na maart 2022 pa determina e regulacion y zonificacion den e MPAs di Parke Marino Aruba. Asina FPNA ta spera di por yega na un plan di maneho den e di dos quartal di 2022 cu ta considera e meta primordial di conserva e bida marino, pero tambe ta incorpora e aspectonan social y economico.
Banda di e sesionnan organisa, FPNA semper ta keda dispuesto pa reuni cu nos stakeholders ariba peticion. Pa esaki y mas informacion tocante Parke Marino Aruba por tuma contacto cu [email protected].
