Home Politics Minister Rocco Tjon: A BISHITA STICHTING RECLASSERING & JEUGD BESCHERMING (SRJB)...

Minister Rocco Tjon: A BISHITA STICHTING RECLASSERING & JEUGD BESCHERMING (SRJB) Y A RICIBI PRESENTACION DI PROYECTONAN PA PRESUPUESTO 2022

SHARE

ORANJESTAD – Recientemente, Minister di Husticia y Asuntonan Social Sr. Rocco Tjon, tawata di bishita serca Stichting Reclassering en Jeugdbescherming (SRJB), caminda a sera conoci cu e ekipo di maneho como tambe e directora di SRJB esta Sra. Seraida Pemberton – Leonard. Durante e bishita aki Minister Tjon a ricibi un presentacion amplio di proyectonan cu ta cay bou di SRJB. A elabora tambe riba algun di e proyectonan aki pa asina brinda un miho tratamento y guia di hobennan cu ta cay den man di Husticia.

 

Segun Minister Tjon, a trata di un reunion sumamente informativo y interesante tambe mirando e trabou cu SRJB ta haci. SRJB tin un tarea hopi importante pa loke ta amplia e bienestar y siguridad en general, y ta haci esaki a traves di procesonan di resocialisacion y reintegracion. Tambe a papia riba diferente proyectonan cu SRJB lo kier rebiba bek, e aña binidero cual ta cuadra bon cu e “beleidsvoornemens” tambe di Ministerio di Husticia y Asuntonan Social. 

 

Den cuadro di esaki, a papia di algun proyecto prinicipal manera Kamer Begeleid Wonen (KBW) y Elekronische Toezicht (Enkelband). Kamer Begeleid Wonen (KBW), ta un proyecto cu ta ensera cu e hobennan cu a cay den man di husticia pero no a bay sera na KIA ta haya e oportunidad pa bay den e KBW. Akinan e hobennan ta haya un guia pa asina siñanan bira hobennan independiente. Ta yuda nan pa yega na un vivienda y ta yuda nan haya trabou. Siguiente proyecto cu a papia di dje ta e Elekronische Toezicht (Enkelband), e proyecto aki ta necesario pa Aruba ya cu un persona cu haya un “voorwaardelijk invrijheidsstelling (VI)” por haya e esaki nan nan enkel y por sigui unda e persona ta bay y si e ta cumpli cu e acuerdonan segun ley. 

 

E Mandatario a splica cu, proyectonan manera KBW, pero tambe Electronisch Toezicht ta proyectonan cu ta di balor agrega, y si mira e resultado di e balor agrega cu esaki ta bay tin no solamente pa husticia en general pero muy en particularmente tambe den bida di e hobennan, esakinan ta proyectonan cu sigur por conta cu sosten di Ministerio di Husticia y Asuntonan Social. Actualmente lo ricibi for di SRJB e “projectdossier” pa asina wak con ta bay acapara esaki den presupuesto 2022. E sumanan cu ta necesario ta sumanan cu por wordo presupuesta a base di e “projectdossier” pa asina logra tuma e decision final.  Ora mira e cifranan aki, caminda 75% di e hobennan cu pasa a traves di un proyecto manera KBW, ta hobennan cu no ta cay bek riba e mal caminda, pues e impacto cu e proyectonan aki tin den bida di e hobennan aki ta di balor agrega.

 

Por ultimo, Minister Tjon a elabora tambe riba e parti di Electronisch Toezicht, cual ta conceptonan cu den reino mes ta wordo usa, por ehempel na Hulanda, Boneiro y Curacao. E balor agrega di esaki ta diferente, den sentido cu e ta baha gastonan pa loke ta esnan sera na KIA como tambe eleva e siguridad pa esnan cu ta traha na KIA y e hoben mes. Lo mester defini si, naturalmente, e cuadro pa loke ta e maneho, dus ki tipo di delitonan ta bin na remarke pa por introduci Electronisch Toezicht, sinembargo e balor agrega ta consisti di diferente fasetanan.