ORANJESTAD – Diamars atardi Minister di Turismo Sr. Dangui Oduber a bishita e Oficina di Turismo na San Nicolas. E oficina aki tabata cera y Minister Oduber a zorg pa e habri bek na aña 2019 pa brinda servicio na e turistanan cu ta bishita San Nicolas. Minister Oduber ta kere firmemente den e potencial cu San Nicolas tin pa bira segundo capital turistico di Aruba.
Pa locual ta trata e cantidad di bishitante cu a haci uzo di e Oficina di Turismo aña aki, e cifra a conoce un subida substancial compara cu aña 2020. Si haci un comparacion di e ultimo tres lunanan compara cu aña 2020 por mira un diferencia grandi den e cantidad di turista cu a bishita e Oficina di Turismo na San Nicolas.
Aki por mira un comparacion di e cantidad di bishitante entre aña 2020 y 2021
2020 2021
September 65 370
Oktober 107 523
November 74 370
E oficina di Turismo ta opera di dialuna pa diabierna dentro e orario di 9am pa 5pm. Na e oficina e turista lo ricibi tur informacion di kiko tur San Nicolas tin di ofrece. E tourguide lo comparti su conocemento cu e turistanan na un manera profesional, un di e tournan ta e tour di e murayanan di arte den mainstreet.
San Nicolas ta rico den historia, cultura y arkitectura, e turistanan por haya un refleho di e bida diario di e habitantenan di San Nicolas. San Nicolas ta un cuidad bieu y alaves nobo, fuerte y tradicional pero semper evolucionando. Minister Dangui Oduber ta kere den e potencial di San Nicolas y lo zorg pa San Nicolas haya su fair share. Pa e motibo aki Minister Dangui Oduber ta bay sigui inverti den e Oficina di Turismo, San Nicolas ta hayando e atencion cu e merece.
