“Grow Up” y para responsabel pa su propio vision politico, ta loke e miembro di partido AVP, Melvin Tromp ta trece dilanti, ya cu sindicatonan di trahadonan publico, no tin nada pero absolutamente nada di haci cu loke Hulanda kier of no kier.
“Na prome luga ningun dia Prome Minister Evelyn Wever Croes a envolvi ni sindicatonan y tampoko Parlamento ora cu el a hiba su vision politico Den Haag y a pone riba mesa, cu su gobierno lo impone un medida di reduccion salarial di 12.6% riba trahadonan publico.
Ta su persona, ta su mes a sigura Hulanda cu e reduccion salarial aki ta uno cu ta parti di su gobierno pa reduci gasto di personal manera Hulanda a exigi pa e haci.
Aki na Aruba e Prome Minister tabatin e pudor di hunga comedia y gaña sindicatonan y Parlamento cu e 12.6% aki, tabata pa yuda den e proyecto di FASE pero awor di repente e ta purba di convence tur hende cu e medida aki ta un decision di Hulanda.
Raymond Knops a coregi Evelyn no na un ocasion pero varios ocasion riba e mentira aki, ora cu e kier a hunga sabi, bailando gobierno Hulandes despues cu el a gañ a henter pueblo di Aruba despues di eleccion di 2017, cu promesanan cu nunca el a cumpli cu nan.
Awor como Prome Minister den un forma increibel, ta mustra di no ta intimida pa sindicatonan di trahadonan di gobierno ya cu ta Hulanda ta culpabel cu a impone e medida di 12.6% riba trahadonan di gobierno, pues labando man totalmente.
Bisando cu e no por haci nada, cu Hulanda no kier pa kita e 12.6% ta mescos su persona bisa sindicatonan pa nan mes bay Hulanda intermedia cu Raymond Knops & Co, como sifuera ta e sindicatonan ta gobernando aki na Aruba.
Hulanda a ehecuta e vision di Evelyn Wever Croes y ta increibel con cu despues di Knops na varios ocasion a mustra cu e medida aki a Sali for di cabes di e lider di MEP, e kier sigui baila tur hende, tirando culpa riba gobierno Hulandes.
Insultando sindicatonan cu su gobierno “no por complace” deseo di e sindicatonan di trahadonan publico, ta otro indicacion cu Aruba tin un Prome Minister cu tini cu “grow up” ainda como mandatario y cualkier mandatario cu tin un tiki honor di su mes, si e no sali na defensa di trahadonan publico, hala un banda y laga otronan cu no a crea e desaster aki, bay drecha e desaster.
Evelyn ta pidi sindicatonan pa no bay den un paro general pero e ta lubida cu e accion aki ta un accion contra e forma el a abusa di confiansa di trahadonan publico, ranca placa for di nan cartera c’un pretexto di FASE cu a resulta despues di no ta berdad.
Con un hende asina por pidi comprension di sindicatonan si su persona mes manera un atracado den scuridad di anochi, a kita placa di trahadonan usando un mentira.
Awor un biaha mas ta trata di intimida sindicatonan cu te ora cu Hulanda tabrinda Aruba sosten financiero, su gobierno no por haci mucho cos, e no por haci net nada pero ta Evelyn su vision a wordo ehecuta, no di Hulanda y su persona como inventor di e medida aki, bay busca con pa soluciona esaki na Den Haag.
Bay, lanta awe bay Den Haag y bisa Knops; ‘mi a gaña trahadonan publico’ y busca un otro forma pa reduci gastonan di persona cu bou di su gobierno, a sigui crece tur aña cu miyones,” Melvin Tromp di AVP a declara