Home » Otro Siman, Hues na Haarlem lo dicta sentencia den e caso di asesinato di e Arubiano Lindomar G. Maduro (31)

Otro Siman, Hues na Haarlem lo dicta sentencia den e caso di asesinato di e Arubiano Lindomar G. Maduro (31)

by Admin
0 comment 110 views

Ministerio Publico  na Haarlem a exigi 13 aña di castigo di prison pa e persona cu a asesina e Arubiano Lindomar Maduro y pa a deshaci di e curpa door di bent’e den e meer Mooie Nel, na Haarlem.

Haarlem, Hulanda-
Ministerio publico na Haarlem a exigi 13 aña di castigo di prison pa e sospechoso Mitchell van R. di 34 aña, biba na Haarlem, Mitchell lo ta e persona cu lo a tira e homber Arubiano Lindomar Maduro mata riba e anochi di 7 pa 8 di maart 2020.
Lindomar Maduro a wordo tira den un Loods riba Bingerweg na Haarlem, e la ricibi un impacto di bala na su curason y a fayece mesora na e sitio.

Algun dia despues cu Maduro a fayece, su curpa a wordo lora den un pida lona y benta na awa den e meer Mooi Nel na Haarlem. Pa e curpa no bin halto y keda den fondo, nan a yena e lona, cu algun tegels di caya. Un luna despues cu e la wordo benta den e meer Mooie Nel, e curpa a wordo haya lora den e lona.

Durante e tratamento di e caso a sali na cla, cu Mitchell van R. (34) a cumpra un boto riba markt y a wordo ayuda pa Serkan Ö. Nan a transporta e curpa riba e boto chikito y a bent’e curpa den e awa, di e meer Mooie Nel. Mitchell cu su complice Serkan Ö a haci esaki  den oranan di marduga.

Ambos mester a presenta den corte na Schiphol. Na prome instante Serkan Ö a desmenti su envolvimento y a keda bisa cu e no a yuda Mitchell van R.  Na momento cu Serkan mester a presenta den corte, e la bin confesa su envolvimento y cu enberdad e la yuda Mitchell. Officier van Justitie a exigi un aña di castigo di prison pa Serkan Ö.

Segun prensa Hulandes, Lindomar Maduro no tabata tin lugar di biba e momento ey y tabata bibando den un Loods, aki ta unda e la wordo asesina tambe. E loods aki tabata wordo uza pa Mitchell, kende tabata deal den cuenta di brommer. Serkan Ö. constantemente tabata bishita e loods aki.

E anochi di 7 pa 8 di maart 2020, Maduro lo tabata razo pa motibo cu e no tabata tin placa. Maduro tabata tin problema cu adicion di entre otro gambling. E anochi aki e tabata basta bou influencia di alcohol y droga y tabata hopi razo. Mitchell Van R. a yega na e loods, cu un arma di candela carga den su jas, segun Mitchell e lo a bay cu e arma pa spante y menas’e  pa e por calma, pero lamentabelmente esaki a bay full robes.

Maduro a ataca Mitchell y segun Mitchell e la hay’e obliga di a tira Maduro mata. Segun Ministerio Publico, Corte no mester bay tras  di locual Mitchell a declara. Segun Ministerio Publico, Mitchell mester por a tuma un desicion menos drastico, si e la haci esaki como self defense mes, e lo a yama polis y no a deshaci di e curpa, bentando esaki den e Meer, cu e intencion pa e desaparece pa semper.

Despues cu e curpa a wordo haya, hopi liher Mitchell y Serkan a bira e dos sospechosonan. Durante un entrada hudicial den e Loods caminda Maduro tabata biba, polis a bin topa cu un cargamento grandi di droga, entre otro cocaina y MDMA. Ambos sospechoso a wordo poni responsabel pa e cargamento di droga aki. Tambe den e loods durante un tercer doorzoeking nan a bin topa cu un arma di candela di un kaliber hopi halto, tabata trata di un Kalasjnikov. Mitchell a desmenti categoricamente cu e arma aki no ta di su persona. Segun Mitchell un persona lo a bay na e loods y lo a laga esaki atras, pero e fingerprintsnan haya riba e arma y e DNA ta di Mitchell van R.

Dialuna 13 di december Hues lo dicta sentencia.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio