Home Dutch Kingdom Di tres lustro di Ieder Kind een Kerst Cadeau na Kòrsou

Di tres lustro di Ieder Kind een Kerst Cadeau na Kòrsou

SHARE

Rotaract Club of Curacao, Dolfijn FM i Children’s Museum Curacao ta bolbe uni forsa pa kolektá regalo pa kada mucha riba nos Isla por risibi un regalo di Pasku.

WILLEMSTAD – E siman akí nos ta organisá pa e di 15 biaha e tan konosido Ieder Kind een Kerst Cadeau kaminda nos ta hasi un yamada na tur hende pa regalá ún òf mas regalo ku lo yega na e muchanan ménos privilegiá riba nos isla. E aktividat akí ta di 8 te i ku 12 di Desèmber.

Esaki ya ta e di tres lustro i e aktividat akí ta te ainda un di esunnan mas grandi riba nos isla. E petishonnan hopi biaha ta drenta ya promé ku verano serka tantu Rotaract komo Dolfijn FM. Esei ta indiká kon grandi e ta i ku e kampaña di kolekshon ainda ta sumamente relevante. Un rekòrt di mas ku 7000 regalo a keda rekohé aña pasá i e meta ta naturalmente hasi mas di miles di mucha kontentu e luna akí.

E reglanan di wega di e aktividat no a kambia; e regalo mester ta nobo i lorá den papel di regalo, e balor mester ta entre diessinku i bintisinku florin, riba dje mester tin poné si e ta pa un mucha hòmber (H) òf pa un mucha muhé (M) i tambe pa kua edat e ta adekuado.

E organisashon ya pa añanan largu ta traha huntu ku diferente tienda di huguete ku ta antisipá mashá bon mes ku e aktividat di kolekshon. Tantu Top1Toys na Zuiktertuin Mall, COS+ na Promenade, Childrens Museum i Mensing’s Caminada na Rooi Catootje i Toy Box Curacao na Santa Rosaweg ta hasi un donashon di ún regalo ektra na benta di kada dies regalo.

For di Djarason 8 te i ku Djadumingu 12 di Desèmber tur hende ta bonbiní ku un regalo na e studio di Dolfijn FM na Mambo Beach.
E organisashonnan ku ke hasi un kontribushon (finansiero) na benefisio di e proyekto akí por tuma kontakto ku Rotaract, na number di telefon 523-6722 òf via pòst elektróniko (email) iederkindeenkerstcadeau@gmail.com.

Durante e periodo di kolekshon lo tin un programashon adaptá na Dolfijn FM, pa asina aserká un públiko mas grandi posibel i asina tambe tene pueblo na altura di e kantidatnan kolektá.

E organisashon di Ieder Kind een Kerst Cadeau ta hasi un yamamentu urgente na tur hende pa duna un regalo. Naturalmente mester surti i repartí tur kos ku ohalá lo ta mas di miles di regalo i ku ta un trabou bastante pisá. Studio ta abrí pa públiko for di Djarason 8 te i ku Djabièrnè 10 di Desèmber te 18:30 i durante fin di siman di 10:00 te 17:00. Sigui kontrolá durante e siman di aktividat e kanalnan di medionan sosial di Kada Mucha Un Regalo di Pasku i nan partnernan pa mas notisianan relevante!

Mas informashon tokante Ieder Kind een Kerst Cadeau ta optenibel riba www.dolfijnfm.com i riba e kanalnan di medionan sosial di e empresa di medio. Por skucha Dolfijn FM riba 97.3 FM i via e website anteriormente menshoná.