Home Politics Minister Rocco Tjon: A BISHITA ASOCIACION SONRISA RIBA DIA INTERNACIONAL DI...

Minister Rocco Tjon: A BISHITA ASOCIACION SONRISA RIBA DIA INTERNACIONAL DI PERSONANAN CU CAPACIDAD LIMITA

SHARE

 

 

ORANJESTAD – Awe 3 di December ta un dia special rond mundo, awe ta dia Internacional di Personanan cu Capacidad Limita. Den cuadro di e dia special aki Minister di Husticia y Asuntonan Social Sr. Rocco Tjon a bishita asociacion Sonrisa awe mainta, cual ta  un asociacion di mayor, famia y amigo di personanan cu limitacion mental, pa asina wak con nan ta celebra e dia aki como tambe duna un man na prepara algun regalitos pa dia di Sinterklaas. 

 

E tema cu Nacionnan Uni a scoge como enfoke pa aña 2021 ta “Liderazgo y participacion di personanan cu desabilidad, na caminda pa un mundo post-covid-19 cu ta brinda inclusion, accesibilidad y cu ta sostenibel”.  Y esaki ta loke cu Ministerio di Husticia di Asuntonan Social tambe ta boga p’e. 

 

Sonrisa ta un asociacion di mayornan cu a base di recaudacionnan di fondo a logra haña tereno y traha e edificio cu nan ta aden actualmente. Cu aña nan a bini hunto pa crea un centro di traimerdia pa nan yiunan. Mas despues a logra traha un plan di proyecto pa asina por haya subsidio di gobierno pa por cumpli cu e gastonan basico di e centro. Esaki a logra haya ayudo di parti di gobierno den forma di profesionalnan di traimerdia pa asina ofrece e clientenan un  programa cu contenido riba nan nivel, despues di scol. Sonrisa ta ofrece actividadnan social recreativo na tur su miembronan, y ta traha cu personanan di diferente edad. 

 

Sonrisa, tambe ta prepara nan clientenan pa un trabou, pues cu añas Sonrisa a logra expande y a bin cu e proyecto “Trampolin pa Trabou” cual ta un cafe situa na e centro di Sonrisa. E clientenan cu a “gradua” di e programa di Sonrisa ta traha den e cushina di Trampolin, caminda nan mes ta traha cuminda pa e traimerdia y otro centronan. E Mandatario a keda hopi impresiona cu tur e trabou y servicionan cu asociacion Sonrisa ta ofrece na e comunidad di personanan cu capacidad limita y ta aplaudi e directiva esta; Sra. Marien Lacle “Centrumhoofd” di traimerdia Sonrisa como tambe Sra. Anqelique Perez kende ta coordinadora di Sonrisa, Trampolin pa Trabou y Ambiente Nobo y henter e ekipo di Sonrisa pa e bunita trabou cu nan ta eherce cu hopi pasion pa nos hendenan.

 

Por ultimo Minister Tjon, a expresa cu Ministerio di Husticia y Asuntonan Social tambe ta uni su mes na e dia aki di reflexion y conscientisacion y ta pidi sosten di henter comunidad pa inclusion y solidaridad.