Home Politics Minister Arends: Potencialnan di sector maritimo como pilar economico nobo pa Aruba

Minister Arends: Potencialnan di sector maritimo como pilar economico nobo pa Aruba

SHARE

 

 

Esfuerzonan pa expande e sector maritimo como pilar economico nobo pa Aruba ta sigui. 

Diamars 30 di November 2021, Minister Ursell Arends a ricibi bishita di representantenan di Dammers Group hunto cu director di Directie Scheepvaart, sr. Donata, den cuadro di identifica e potencial maritimo como pilar economico nobo pa Aruba. 

 

Dammers Group ta un compania cu ya tin mas di 50 aña ofreciendo servicionan di transporte maritimo cu hopi conocemento y experticio. Den un combersacion hopi interesante e represtantenan di Dammers Group sr. Robert van Heulen y sr. Peter Govers a duna splicacion amplio tanto di e situacion actual den e sector  maritimo den Caribe y mundialmente como tambe e potencialnan den e sector pa locual ta trata e ancramento y otro servicionan den nos awanan teritorial. 

 

Na nivel internacional ta conoci cu 80% pa 90% di economia ta posibel pa medio di of riba lama. Den e sector maritimo tin hopi actividad cu por crea un ‘spin off effect’ directo pa nos economia. Mirando e situacion cu nos a conoce den e pandemia, dependiendo solamente di turismo, a crea mas cu nunca e necesidad pa amplia nos vision y sondea otro posibilidadnan y activa potencialnan exsistente. 

 

Minister Arends un biaha mas a  confirma e compromiso di Gobierno di Aruba, como tambe bou di su Ministerio pa reactiva potencialnan economico maritimo, semper den balanse cu proteccion di naturalesa y medio ambiente. Pa logra esaki tin trabaonan pa wordo haci di parti di Gobierno pa asina por posiciona Aruba como un partner strategico internacional. 

 

“Aruba ta bendiciona cu su posicion geologico strategico y cu awanan cu por ta fuente di prosperidad economico pa nos Pais. Cu un strategia y maneho inteligente nos por logra beneficia di maximo potencial”.

 

30 November 2021