MIKE EMAN: GOBIERNO KIER SACA 80 MIYON FOR DI NEGOSHINAN NA ARUBA

Den menos di dos anja gobierno kier bai cobra bek, pa medio di SVB, mas di 80 miyon florin for di empresanan mediano y chiquito. Segun gobierno mas di 1800 empresa inhustamente a haya mas “salaris subsidie” cu nan tabata tin derecho riba dje. “Nos ta teme cu hopi negoshi na Aruba no ta prepara pa por bai sobrebibi sin “salaris subsidie” corda bai paga bek e sumanan cu gobierno ta menciona, anto den un termino di dos anja”, e lider di fraccion di AVP mr. Mike Eman a expresa cu hopi preocupacion.
Den Parlamento gobierno durante tratamento di e ley di “salaris subsidie” a informa cu lo bai na cobra e empresanan aki, pasobra segun calculacion cu a haci via departamento di impuesto e empresanan aki a haya demasiado salaris subsidie. Eman ta bisa cu mester atende e asunto aki cu hopi cautela.
“Nos por a mira na Hulanda con un proceso asina di cobra majornan bek sumanan di “kindertoeslag” cu supuestamente nan lo a haya dimas of no tabata tin derecho riba dje a desemboca den un proceso hopi inhusto den cual miles di famia a bira victima. For di esaki a sali un rapport devastador bao di e titulo “Ongekend Onrecht”. Un inhusticia nunca bisto, tabata e conclusion di e investigacion parlamentario, ta locual a worde cometi contra miles di famia inocente”. E Lider di fraccion di AVP, mr. Mike Eman a enfatisa cu e tono rond di e cobramento aki na Aruba tin tur e ingredientenan pa bai cana den e mesun direccion cu ta describi den rapport “Ongekend Onrecht”.
E comision parlamentario na Hulanda a conclui cu e cobramento bek den miles di caso tabata ilicito, discriminatorio y inadecua. Tabata tin un prehuicio institucional y violacion di principionan fundamental di un estado di derecho. Aruba por sinja di e experiencia aki na Hulanda. Especialmente di locual e comision parlamentario Hulandes, haciendo un tremendo trabao, a revela na abuso di poder administrativo. E investigacion parlamentario a prueba cu no tabata tin un base pa exigi e pagonan aki bek. E rapport “Ongekend Onrecht” a denuncia cu inhustamente a somete 26.000 major na anjanan di tortura mental y abuso di poder. Mas di 70.000 mucha a keda afecta. Hopi gobernante a worde teni responsable pa e abuso di poder aki y finalmente gabinete Rutte II mester a tuma su retiro.
E lider di fraccion di AVP, mr. Mike Eman ta bisa cu lo keda vigila e asunto di cobramento bek di “salaris subsidie” na Aruba di hopi serca pa no sosode mescos na Aruba. Tambe e ta puntra su mes, den un contexto macro economico, si ta realistico, prudente y husto pa bai ranca 80 miyon awor for di un comercio hopi abati y debilita. Ta parce manera e gobierno di Evelyne Wever Croes no kier realisa cuanto nan a perhudica y chica e pueblo caba, e lider di fraccion di AVP, mr. Mike Eman ta finalisa bisando