Home » E prome Premio Nacional “Crioyo di Oro” Jossy Brokke a ricibi homenahe grandioso

E prome Premio Nacional “Crioyo di Oro” Jossy Brokke a ricibi homenahe grandioso

by Admin
0 comment 66 views

Diaranson dia 1 di december Cas di Cultura a bisti di gala y tabata completamente yena di fanaticonan, amigonan y famia di nos baluarte local Jossy Brokke Jr.
Un homenahe nunca antes bisto riba nos isla a tuma lugar cu a wordo brinda na un baluarte cultural tanten cu ainda e ta na bida. 


E forma cu henter e evento a wordo presenta e anochi aki a duna tur esnan presente e sintimento cu nan tabata experenciando un berdadero “nochi di Hollywood”. Un produccion di calidad haltisimo. E homenahe musical aki a conta cu un elenco impresionante di cantante y musico cu durante un poco mas di 4 ora largo a presenta un mahestuoso concierto dedica na Jossy Brokke Jr. Durante e evento aki, Jossy Brokke mes a presenta varios di su temanan tambe incluyendo su cancion inmortal “Pais”.

 

Fundacion Go Cultura representa pa cantante Edjean Semeleer a sorprende Jossy y tur presente cu e anuncio di un premio nacional cu a bira realidad e aña aki.  Jossy a wordo nombra como e prome “Crioyo di Oro” como merito di excelencia artistico y a ricibi e galardon aki for di man di Ministro di Finansas y Cultura Sra. Xiomara Maduro. “Premio Nacional Crioyo di Oro” lo ta un premio anual presenta pa Fundacion Go Cultura den aliansa cu Ministerio di Cultura y Gobierno di Aruba, pa reconoce e trabao, dedicacion y esfuerzo di nos baluartenan local cu a duna nan aporte pa e desaroyo cultural di nos isla.

Tur esnan cu tabata tey presente tabata di acuerdo cu e homenahe aki na Jossy Brokke tabata uno cu el a merece pa e logro di su 65 aña den e mundo di entretenimento y pa tur loke el a haci y significa pa Aruba. Tur esnan presente tabata consciente cu nan a experencia un anochi historico y inolvidabel. Specialmente na momento cu a presenta e premio nacional cu e aña aki a bay pa Jossy Brokke.

 

Como parti di e proyecto aki tambe lo tin un documentario biografico di Jossy Brokke cu lo wordo estrena den e prome mitad di aña 2022 y tambe estreno di e grabacion di e evento ariba pantaya di television dentro di poco.

 

Nos por bisa cu Fundacion Go Cultura por mira bek riba un evento sumamente exitoso, historico y inolvidabel cu sigur ta algo cu pa prome bes ta wordo haci di e forma aki riba Aruba. 

Pabien na nos baluarte local Jossy Brokke jr. cu su 65 aña den farandula, pa su homenahe excepcional y pa a bira e prome ganador di “Premio Nacional Crioyo di Oro”. Nos felicitacion tambe na Fundacion Go Cultura cu a percura pa presenta y ehecuta un proyecto exitoso cu merece continuacion y apoyo di nos comunidad. 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio