Pascual Brown ta un persona cu tin problema mental, e la tira Richi Henao Tavarez mata, Richi tabata un amigo di Pascual Brown.
Oranjestad, Diahuebs Hues a dicta sentencia den e caso di asesinato den cual Richi Henao Tavarez a perde su bida, na momento cu Pascual Brown naci na December 1998, a los un tiro fatal den direccion di Richi Henao Tavarez riba 12 di april 2021.
Psychiater a conclui cu Brown ta sufri di problema mental
E psychiater cu ta trata Pascual Brown a bisa cu for di e raport di reclasering, no a bin niun cambio den su conclusion. Psychiater a conclui cu Brown ta sufri di problema mental y esey a causa cu e la tira Richi mata.
Fiscal a pidi 16 aña di castigo di prison pa Pascaul Brown
Fiscal a concentra riba e asesinato di Richi Henao Tavarez (20). E morto di Richi a causa un dolor hopi grandi na su famia. Segun Fiscal no tabata tin ningun motibo pa Brown a tira Richi mata.
Es mas e la wordo asesina door di un amigo. Richi no tabata tin problema cu ningun hende. E tabata manera un sorpresa cu Brown a yega na e cas na Brazil y a tira Richi mata, kende inocentemente tabata sinta den veranda di su cas.
Fiscal ta haya cu Brown, premedita a tira Richi mata. Segun e sentencia di Corte Supremo, e hecho cu e sospechoso tin un problema mental, no ta un motibo pa bisa cu e no ta culpabel. Pascual a sali for di Oranjestad bay te Brazil. Na caminda e la haya un arma di candela y a dura por lo menos 15 minuut prome cu e la yega na e cas caminda Richi ta biba. E ta haya cu Pascual tabata tin tur e tempo pa para y bira bay bek. Pero Pascual a bay sconde na e cas pa e no wordo mira. Despues cu e la tira Richi mata, gebuk e la core bay bek den auto. Esaki ta un ehempel di morto sanger frieu.
Fiscal a señala cu tanto na polis y den corte, Pascual Brown tabata duna declaracion cu no ta cuadra cu e berdad. Esey ta mustra cu e tabata sa bon, cu e la haci malo y e ta na purba sconde esaki. Asesinato ta un di e delitonan di mas serio cu ta existi. Brown a mata Richi, lagando asina un mucha chikito sin tata. Fiscal ta tuma Brown na malo pa loke e la haci. Brown mes a bisa cu e la mira cu e partner di Richi a mir’e, pero asina mes e la tira. Fiscal a remarca cu Brown no a mustra niun momento cu ta duel’e loke e la haci. Fiscal den su demanda a tene cuenta cu e raport di psychiater y a exigi 16 aña di castigo di prison pa Pascual Brown.
Hues a dicta sentencia
Via un video conference Hues a dicta sentencia. E la bisa cu e ta haya legalmente proba cu 12 di april 2021, Brown a bay cu un arma di candela te na cas di Richi y a tira un biaha, esaki a alcansa Richi den cabes. Segun Patologo, e tiro cu Richi a ricibi na su cabes ta e causa di su morto. Hues a sigui bisa cu ta conoci cu si tira cu un arma di candela den direccion di un hende, e persona por muri. Pa e acusacion di asesinato o sea premedita, Hues no ta haya cu tin suficiente prueba.
Brown a declara den e caso cu e tabata na vuurtoren y a sinti algo. E la dicidi di bay papia cu Richi y regla un mal comprondemento y tambe di e trato cu e ta duna Lis( pareha di Richi). Segun Brown na caminda e la topa cu un homber Venezolano y dicidi di cumpra un arma di candela for di e homber aki. Na cas di Richi, yen cos a cuminsa pasa den Brown su cabez y esaki lo a pone cu e la perde cabez. E la saca e arma y ora e la mira cu Lis a mir’e, e la tira.
Mirando e declaracionnan aki y raport di psychiater no por exclui cu Brown su emocionnan a subi.
Hues a haya No proba a asesinato, pero Si Mata. si un hende tin problema mental, lo por conclui si un persona ta conciente kiko e ta haci. Den e caso aki psychiater ta haya cu Brown ta conciente kico e la haci y a sentenci’e cu 10 anja y 6 luna di castigo di prison.