Home Politics Minister Rocco Tjon: A SERA ACUERDO CU ARUBA AIRPORT AUTHORITY (AAA) PA...

Minister Rocco Tjon: A SERA ACUERDO CU ARUBA AIRPORT AUTHORITY (AAA) PA PRE-FINANCIAMENTO DI INVERSIONNAN CAPITALISTA PA POST BRANDWEER ARUBA NA AAA

SHARE

 

 

ORANJESTAD – Durante rueda di prensa Diahuebs mainta, Minister di Husticia y Asuntonan Social Sr. Rocco Tjon conhuntamente cu colega Minister di Salud Publico y Turismo Sr. Dangui Oduber a elabora riba e cooperacion cu a logra sera entre Aruba Ports Authority (AAA) y Brandweer Aruba pa asina yega na un acuerdo caminda Brandweer Aruba por haci peticion pa loke ta inversion capitalista na AAA y AAA lo por pre-financia esaki

 

Minister Tjon a expresa di ta hopi contento di por haci e anuncio aki, despues di a tene varios reunion cu sindicato y ekipo di maneho, reunionnan cu tawata andando caba for di tempo di parlamento. Algun siman atras a tene anochinan informativo pa tur personal caminda a splica e proceso di e acuerdo nobo aki. A base di e acuerdo cu pais Aruba a sera cu AAA na aña 2014, articulo 4 pa ta preciso di e acuerdo aki ta stipula cu brandweer lo por haci su peticionnan pa loke ta inversionnan capitalista na AAA y AAA lo por pre-financia esakinan. Aruba su economia ta depende grandemente di Turismo, pues mirando e importancia cu Brandweer tin pa pais Aruba, e ta hopi importante pa Brandweer ta bon ekipa pa nan por brinda e servicio necesario, no solamente na Aeropuerto pero tambe na tur nos hotelnan.

 

Di otro banda, e ta yena nos cu alegria di por comparti e anuncio aki, pasobra cu e acuerdo aki nos ta bay garantisa tambe e siguridad di tur esnan cu ta traha na Brandweer. A base di esaki a tene reunionnan cu AAA, caminda a deduci cu e fondonan ta disponibel. Na e momentonan aki, a base di e comision di trabou existente pa instala entre e Ministerio di Husticia, entre ekipo di maneho y sindicato, lo nos ta en espera di tur e ofertanan pa asina de inmediatamenteadkeri tur material necesario. Aki ta papia di ekiponan di proteccion personal, “blusbakken” , aparato pa respiracion, diferente autonan cu ta necesario, “crash standers” , “tankwagens” etc. 

 

Anteriormente e pensamento tawata cu kisas lo mester reparti e adkiricion di tur e materialnan aki den un periodo di un paar di aña. Sinembargo a base di e construccion nobo aki lo por adkiri tur cos de inmediatamente. Un otro punto hopi importante ta e “meerjaren beleidsplan” pa loke ta e parti di “bedrijfsvoering” mirando cu esaki ta pa e inversion capitalista, pues pa loke ta e costonan operacional, esakinan lo bay ankra den e demas añanan pa asina for di e presupuesto por percura tambe cu tur e materialnan aki cu ta bay wordo adkiri por wordo manteni tambe. 

 

Por ultimo e Mandatario a duna un danki grandi, muy en particular na tur esnan cu ta traha na Brandweer pa e pasenshi cu nan tawata tin como tambe e profesionalismo cu a wordo demostra pa asina por haci esaki un realidad. Pues, simplemente hopi contento y agradecido na e personal di Brandweer, Conseho di Minister cu a apoya e proposicion aki y na colega Minister Oduber pa e cooperacion di su Ministerio.