Paul Croes na Oktober despues di keda sentencia cu tres aña di castigo di prison a apela. E sentencia di tres aña di castigo di prison, tabata pa maluso di su poder como Minister, pa Ontheffing y tuma regalo (giften). E caso aki ainda pendiente ki dia e lo mester bolbe presenta un biaha mas den corte.
Lamentabelmente un biaha mas ex Minister di AVP Paul Croes ta wordo sentencia pa Hues. E biaha aki pa un otro caso, e caso di kitamento di propiedad, relaciona cu labamento di placa. Hues a haya Paul Croes culpabel di labamento di placa di mas di 183 mil florin, e mester paga 183 mil florin of e ta bay un aña cera na K.I.A.
Oranjestad- Diahuebs den oranan di mainta trempan, Paul Croes su caso tabata den corte. E biaha aki tabata trata di e caso di kitamento di propiedad, door di labamento di placa.
Hues a dicta sentencia den e caso penal cu Ministerio Publico a cuminsa contra Paul Croes pa kitamento di propiedad relaciona cu labamento di placa.
Na oktober Corte di Husticia a cuminsa trata e caso aki, den cual Fiscal a bisa cu den casonan di kitamento di propiedad nan ta basa nan mes, riba e calculacionnan cu a wordo haci den actividadnan criminal.
E hecho cu awor nan no tin placa, no ta relevante pa Husticia.
Paul Croes a wordo condena den hof pa entre otro labamento di placa conforme locual Ministerio Publico a demanda. E demanda tabata algo mas cu 207 mil florin. Ademas si e no paga, tin un detencion di maximo tres aña di castigo di prison colga na dje.
Abogado mr. Illes a bisa Hues cu mester a haci investigacion grandi pa determina cuanto placa a haya ora di casamento. Hof a pone esaki un banda. Abogado a haci un apelacion na hues pa tuma esaki na cuenta. Na opinion di e abogado, hof ta papia di 183 mil florin. E abogado ta haya cu tin un fayo den e calculacion. E la menciona cu e prestamo di Paul Croes di 16 mil florin den Prome Instancia caminda hof a menciona 6 mil y e 10 mil florin a keda colga den e suma total. E abogado a bay coba den e sentencia pa mustra Hues unda specificamente esaki ta wordo menciona.
Locual ta trata di e 183 mil florin cu hof ta papia di dje, Hues a mantene esaki. Tambe tocante e placa di regalo di casamento Hues no a cambia su desicion y a mantene e desicion di hof.
Na final Hues a dicta sentencia, cu mas cu 183 mil florin a wordo laba, e no a cambia e suma, pero si e demanda di tres aña di castigo di prison pa labamento di placa, Hues a bah’e na un aña.