ORANJESTAD – E aña aki Aruba a conmemora 35 aña di Status Aparte den Reino Hulandes. E lucha pa Status Aparte a cuminsa den añanan 30 y a concretisa dia 1 di januari 1986. E Status Aparte cu a bira realidad danki na e union di henter e pueblo Arubano. Status Aparte a trece hopi beneficio y prosperidad pa Pais Aruba ya cu nos a haya e instrumentonan economico den nos propio man pa desaroya e pais aki exitosamente.
Desde Status Aparte Pais Aruba a conoce cuatro Prome Minister, kendenan durante mas cu un gobernacion a sirbi y duna nan maximo esfuerso pa edifica e Pais aki. Cu awe Pais Aruba por conmemora 35 aña di Status Aparte, ta danki tambe na e contribucion valioso di cada mandatario.
Durante e ‘Conferencia di 35 Aña Status Aparte – Aruba Ta Di Nos Tur’ a presenta un video cu declaracionan refiriendo na nos Status Aparte, haci pa tres Ex-Minister President di nos Pais.
Sr. mr. Jan ‘Henny’ Eman e prome Minister President di Pais Aruba a recorda cu despues di un lucha di mas di 50 aña Aruba a bira pais riba su mes cu e encargo y tarea grandi pa pone Aruba riba pia na un nivel aceptabel pa henter comunidad.
Sr. Nelson ‘Nel’ Oduber e segundo Prome Minister di nos pais cu a guia 4 gobierno a trece dilanti cu tur locual Aruba a pasa den e proceso pa logra Status Aparte. ‘Pais Aruba tin su propio Gobierno y tur su institutonan y e desaroyo cu Pais Aruba tin awe, ta danki na e instrumentonan cu Betico Croes a laga atras pa Aruba mes por a desaroya nos pais, sin cooperacion di Antias Hulandes y esaki ta danki na e Status Aparte’ tabata palabranan di Sr. Nelson Oduber.
Sr. mr. Michael G. ‘Mike’ Eman, e di tres Ex-Prome Minister desde Status Aparte a comparti cu dentro di tur emocion y sentimento di compromiso a nace e deseo, e forsa y impulso pa Aruba ta autonomo. E sentido di racionalidad pa busca e miho modelo na unda por duna contenido na propio sentimento di como pais chikito tambe por progresa den mundo y bay padilanti.
Locual ta resalta den e declaracionan di e Ex-Minister Presidentnan ta cu danki na e Status Aparte nos Pais Aruba a haya e instrumentonan economico den nos propio man pa desaroya Pais Aruba exitosamente e ultimo 35 añanan.
