Home » Parlamentario Marco Berlis (MEP): Situacion alarmante tocante live-in maids aki na Aruba: Sclavitud moderno?

Parlamentario Marco Berlis (MEP): Situacion alarmante tocante live-in maids aki na Aruba: Sclavitud moderno?

by Admin
0 comment 74 views

Awe mi kier a enfoca riba un situacion cu ta wordo menciona masha poco mes den nos comunidad, pero cu alabes ta un situacion cu mester wordo conscientisa riba dje urgentemente. Awe mi kier a papia di e situacion cu hopi live-in maids ta experienciando aki na Aruba. Primeramente, mi a busca informacion di Dimas cu ta confirma cu tin 4705 permiso duna pa live-in maids na Aruba. Esakinan ta extranheronan cu ta procedente for di diferente pais, cu a wordo busca cu un permiso special pa ta un live-in maid, cu ta laga nan famia, pais y amigonan atras pa busca un manera di provee financieramente pa esnan cu nan ta bay laga atras. Esaki ta un situacion hopi dificil y tambe e ta hacinan hopi vulnerabel ya cu nan no tin ningun tipo di apoyo, ni ningun hende aki na Aruba.

 

Ta asina, cu antes cu mi a bira parlamentario, a bin na mi atencion cu tin varios caso di abuso cu ta wordo cometi encontra di e personanan aki cu a bin traha cu un bon intencion y cu e permiso necesario. Tin varios caso unda cu esnan cu a manda busca nan ta nenga di dunanan nan derecho y ta paganan loke nan kier, no ta paga overtime, ta pone nan traha sin dia liber, no ta dunanan descanso, ni tampoco ta duna nan vakantie. Ademas di esaki hopi biaha nan ta wordo intimida, menasa y oprimi. Esaki sigur ta un abuso total y sigur den un Aruba moderno esaki ta totalmente inacceptabel. Pa esnan cu ta practica e abuso aki, nos kier cordanan cu nan accionnan ta wordo considera sclavitud moderno y un inhusticia enorme. Ningun persona merece di wordo trata inhumanamente. Tur hende tin su dignidad, merece di wordo trata cu respet y mester wordo duna su derechonan cu ta hancra den ley. 

 

Dunadornan di trabao mester sa cu tur e derechonan di e live-in maids aki ta hancra den e ley di arbeidsverordening hoofdstuk 6, articulo 23. Tambe DAO ta duna tur informacion di e debernan di pago, vakantie, overtime y descanso na esnan cu ta duna trabao na e personanan aki. Kiermen esnan cu ta emplea live-in maids tin e responsabilidad pa observa y cumpli cu e derechonan y beneficionan di e live-in maids. Ademas nan mester sa cu si nan kibra ley y ta trapa riba nan derechonan humano, e consecuencia pa nan accionnan abusivo ta bay ta fuerte. Pasobra e peso di ley lo baha duro riba nan. Mi ta condena cualkier forma di abuso y forma di sclavitud moderno y ta describi esaki como algo cu hamas nos por permiti sucede of sigui sucede aki na Aruba. Mi kier pa tur live-in maids sa cu nan a haya un bos den mi persona y cu mi ta para cla pa denuncia y yudanan di cualkier forma. Mi kier pa nan sa cu nan no ta nan so y cu nan por conta cu mi.

 

Aruba ta di nos tur, y cada stranhero cu ta bin traha responsabelmente cu su permiso regla, specialmente e live-in maids, tin su derechonan segun ley, di wordo protegi y asegura un futuro y trato husto riba e pida baranca aki cu ta nos pais Aruba. 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio