Home Politics Minister Dangui Oduber – VACUNATHON TABATA EXITOSO DEN WEEKEND CU A PASA

Minister Dangui Oduber – VACUNATHON TABATA EXITOSO DEN WEEKEND CU A PASA

SHARE

ORANJESTAD – Weekend tras di lomba na e ballroom di Ritz Carlton a tuma lugar e vacunathon pa personanan di 60+. Minister di Salud Publico Sr. Dangui Oduber ta contento pa comparti algun informacion di cuanto persona a haci uzo di e oportunidad den weekend pasa pa haya nan vacuna of Booster Shot.

Den e vacunathon ultimo a enfoca mastanto pa vacuna personanan riba e edad di 60 aña, sea ta cu e prome prik, di dos prik of e Booster Shot cu awor ta disponibel pa e grupo di 60+. Durante e weekend a administra un total di 3240 Booster Shot. Riba diasabra a administra 1605 y diadomingo a administra 1635 Booster Shot. Den e dos dia nan aki 33 persona a tuma nan prome prik, aki 3 siman e personanan aki lo mester haya nan di 2 prik. 

Minister ta anuncia tambe pa cu dia 2 di December proximo e vacunacion y e Booster Shot pa personanan di riba 60 aña di edad lo bay continua, e biaha aki na e diferente MFA nan rond di Aruba. Den e dianan nos dilanti lo informa comunidad mas miho riba esaki. “Miho bo prepara bo mes pa bo no lamenta” tabata palabranan di Minister Dangui Oduber.

Un danki ta bay pa e enfermera/o nan di HOH y personal di Praktijk Ondersteuner Huisartsenzorg, trahadornan di SVb, personal di Ministerio di Salud Publico, Crisis Team (BRA). Un danki special na e personal di DVG y tur otro voluntarionan cu a yuda haci e vacunathon aki uno exitoso. Un danki tambe ta bay pa Ritz Carlton cu un biaha mas a pone nan ballroom disponibel pa haci un vacunathon.

Finalmente Minister Oduber kier a gradici cada persona cu a participa den e vacunathon di weekend pasa, boso a mustra un acto di solidaridad y reponsabilidad pa boso mes, boso famia y boso pais.