Durante Conferencia 35 Aña Status Aparte a presenta un video “Aruba Ta Di Nos Tur”
ORANJESTAD –Siman pasa a tuma luga e ‘35 Aña Status Aparte – Aruba ta di nos tur’. Gobierno di Aruba a prepara un bunita programa. E programa a inicia cu presentacion di un bunita video cu a duna un historia breve di Status Aparte for di aña 1933 te cu den decadanan 70. Alabes a mustra algun suceso local y mundial cu a afecta Pais Aruba.
Aruba cu su propio instrumentonan. Aruba awe ta un estado di derecho cu su propio Parlamento y su propio Gobierno. Un pais cu su mesun moneda y un Banco Central pa implementa e maneho monetario di e florin Arubano. Nos pais Aruba awe tin su himno Aruba Dushi Tera y su bandera bulando halto den e aire liber di democracia cu un historia grandi di un lucha.
E lucha pa separacion
Desde añanan trinta di siglo pasa ya caba Aruba tabata tin e deseo pa separa for di e isla mas grandi, esta Corsou. Na 1933 tabata pa prome bes den forma oficial cu e deseo pa libertad a ser vocifera mediante un peticion di Raad van Politie di Aruba y dirigi na La Reina Wilhelmina. Tabata den decada 40 cu e lucha pa separacion for di e Isla mas grandi Corsou a continua. 18 di maart 1948 un peticion firma pa 2.147 ciudadano a ser entrega na su mahestad Reina Juliana na Hulanda door di e politico den en feliz memoria Shon A Eman. E peticion tabata pa Aruba haya mas autonomia. Seis aña despues na 1954 e Statuut a ser firma pa su mahestad Reina Juliana unda Antias a haya mas autonomia.
E anhelo pa libertad a drenta otro dimension
Decada 70 a habri cu e destino di Aruba tabata bou di menasa. Gritonan di independencia di Surinam y Antias tabata resona den ‘wandelgang’ na Den Haag y un Antias independiente cu e sistema electoral di ‘one man, one vote’ lo tabata desastroso pa Aruba. Esaki a sende bek e chispa di candela di libertad bou liderazgo di den feliz memoria Sr. Betico Croes. E anhelo pa libertad a drenta un otro dimension den e lucha pa Status Aparte, pero esaki no a bay facil y a haya confrontacion fuerte den Reino Hulandes. Tabata temponan dificil cu tabata exigi liderazgo y strategia politico.
Simbolonan di Union
Pa logra Status Aparte Aruba mester tabata uni y pa Aruba ta uni mester a crea simbolonan di union den forma di himno y bandera cu dia 18 di Maart 1976 a bira realidad. 30 di oktober 1976 e identidad Arubano a continua cu Aprobacion di Ortografia Etimologico di Papiamento. Aña 1977 tabata e aña decisivo pa Status Aparte unda den un referendum consultativo dia 25 di maart 1977 un mayoria di e pueblo a vota na fabor di independencia. Pueblo tabata decidido pa los di Antias y na Augustus 1977 e lucha por medio di protesta y manifestacion a yega na su climax.
Augustus scur
E Augustus scur aki a hiba nos na un september di claridad unda un delegacion nacional lidera pa sr. Betico Croes hunto cu demas politico, sindicato y gremio di Aruba a biaha pa Hulanda. Esaki tabata e inicio di preparacion pa ‘Conferencia di Mesa Rondo na 1983’. Na maart 1983 den un conferencia di mesa rondo, Prome Minister di Hulanda den feliz memoria Ruud Lubbers a formalisa Aruba su Status Aparte……’De kogel is door de kerk’.
Aruba ta bira Pais y ta enfrenta retonan
Tabata 1 di januari 1986 e nacemento di Pais Aruba, Status Aparte a bira realidad. For di ’Eilandgebied Aruba’ pa ‘Land Aruba’. For di Diputadonan pa Ministronan y for di ‘Gezaghebber’ pa su propio Gobernador. Un Aruba cu un structura estatal nobo pero alabes cu un crisis economico grandi nunca bisto unda refineria Lago a cera su portanan un aña prome. Aruba a pone tur su atencion na turismo y asina turismo a bira e pilar economico di mas grandi. Tabata na fin di decada 80 cu a logra crea un otro pilar y asina refineria Coastal a habri bek su portanan na Aruba pero lamentablemente e refineria a bolbe cera na 2012.
Aruba a conoce hopi desaroyo y desafio durante ultimo 35 aña
35 aña di Status aparte a trece hopi desaroyo na Aruba. Plan Sasaki a resulta decisivo pa desaroyo economico y un parti grandi di nos naturalesa a ser preserva bou di Parke Nacional Arikok. Awe pueblo completo tin su seguro medico AZV. Aruba a sigui crece den populacion, crece den mas ingreso y progreso pero den mesun rosea Aruba a confronta hopi dificultad y reto. Asina Aruba mester a para responsabel entre otro pa e debe di garantia di hotelnan Beta, Ramada y Plantation Bay y alabes Aruba a bira victima di sucesonan mundial manera e atakenan terorista dia 11 di september 2001 riba Twin Towers na New York, na 2005 e desaparicion di e hoben mericano Natalee Holloway, crash den stock market y crisis financiero na 2008 y desde 2018 e situacion politico na Venezuela y su efecto riba nos pais Aruba.
Durante e 35 añanan cu a transcuri nos pais tabata tin e reto di deficit di presupuesto nacional unda e debe nacional di Aruba a sigui crece. Tabata na 2020 unda Aruba despues di hopi tempo tabata na caminda pa un surplus historico den e presupuesto te ora a sosode loke nos nunca por a imagina, e pandemia di Covid 19. Un pandemia, un crisis economico y Aruba pa prome biaha den su historia cu un lockdown. Frontera a cera y e pilar economico turismo a bay plat. Aruba a bay den tempo scur pero awo Aruba ta recuperando danki na e esfuerso di nos tur. Danki na nos frontliners den cuido medico, danki na nos cuerpo policial pa e seguridad y danki na un Gobierno cu a sa di guia Aruba den e rumbo corecto y danki na un pueblo consciente.
Aruba awe ta ser confronta atrobe cu retonan.
Nos pais ta enfrentando e reto pa sobrevivi e pandemia, recupera e economia, stabilisa e situacion financiero y mantene nos Status Aparte manera nos libertador a laga atras pa nos. Esaki ta exigi sacrificio y dedicacion di nos tur paso Aruba ta nos tur.
Esnan presente na e conferencia y esnan cu a sigui esaki via medionan atrabes di imagen hunto cu un naracion a recori un breve historia di Aruba desde 1933 y un bista di e sucesonan local y internacional cu a afecta Pais Aruba.
