Home Politics Booshi Wever: KEDA SIN PAPIA E BERDAD TA CONTRADECI E PRINCIPIO...

Booshi Wever: KEDA SIN PAPIA E BERDAD TA CONTRADECI E PRINCIPIO BASICO DI INTEGRIDAD!

SHARE

Durante reunion di 10 di november ultimo tocante Serlimar, a bira mas cu obvio cu bou tur circumstancia kier sigui proteha esun cu a masacra Serlimar. 

Sr. Arends, cu riba papel supuestamente ta encarga cu integridad, no solamente a sigui proteha e autor intelectual di e masacre di Serlimar, pero su actuacion den Parlamento a mustra claramente cu ela sigui como “de beste jongetje in de klas” e lesnan di con pa DESINFORMA nos pueblo y masha liher mes demonstra cu “NOS TA MESCOS CU NAN”. 

 

E minister encarga politicamente cu Serlimar a culpa tur ex-ministernan pa e situacion di Serlimar, cu excepcion di Otmar. Pio ainda, NINGUN momento a tribi ni di usa su nomber. En cambio esun di mi si el a haya bon pa uza, bisando cu un di e factornan pakico Serlimar ta den e situacion cu e ta awor, ta pasobra e Raad van Toezicht a cuminza traha te na 2008. Pero mi por bise cu e motibo principal di esaki tabata cu tanto gremio comercial como sindical a tarda pa apunta un representante den e RvT.

Ta bon conoci cu e director di e tempo ey, cu por cierto a wordo nombra despues di un proceso transparente di un solicitud habri, a fungi manera e ley ta perscirbi, esta conforme e reglanan di Corporate Governance! Of minister Arends kier insinua cu e director aki a haci su mes culpabel di mal maneho? No ta e mesun minister cu sr. Arends kier proteha, a dune un plakaat como reconocimento como un director intachabel? Of sr. Arends tin informacion contrario awor?

 

Sr. Arends kier bin bisa cu e.o. mi persona NO a cumpli cu e meta pakico e compania estatal Serlimar Sui Generis a ser institui, esta dor di no cobra! Ta bon pa sr. Arends sa cu a cobra, pero no pa tur servicio. Loke nos a haci ta, cumpliendo cu deseo di Parlamento, pa gobierno sigui subsidia te ora cu Serlimar duna e servicio optimal y alabes “verwerk” e desperdicio cu wordo recohí! 

Di unda sr. Arends ta yega na e conclusion cu esaki ta un di causanan cu Serlimar ta den e situacion aki, “mag Joost weten”! Aki un biaha mas ta mustra dede tur caminda y riba otro hende, pero e destructor principal di Serlimar, Otmar y su prome consehero,  ta ser proteha, dor di keda keto riba e corpucion cu a tuma lugar na Serlimar. Porcierto documentacionnan cu mi a manda pa sr. Arends, como minister encarga cu Serlimar.

 

Spencer Johnson a yega di bisa: “”Integrity is telling myself the truth. Honesty is telling the truth to other people”! Cu otro palabra integridad ta sa e diferencia entre bon y malo, y por bisa e berdad na bo mes. Hende sin integridad ta recuri na gañamento y no lo bisa e berdad na otro hende tampoco. Esaki pa mi kiermen tambe cu hopi biaha esnan cu tin boca yen di integridad, juist tin problema pa papia e berdad.

Y ni 50 dia den gobernacion, sr. Arends a recuri na esaki caba, pasobra simplemente e ta GAÑA ora cu eta bisa cu e incenirator chikito ta traha bon. Y cu esaki ya ta un alivio completo pa e bario.

Den un otro articulo lo bay na desenmascara e mentira aki, cu sr. Arends a bin ta bende den Parlamento, na e habitantenan di e vecindario di Parkietenbos y tambe na nos pueblo. Pasobra mientras mi ta trahando riba e articulo aki, ayera ainda huma tabata sali for di dump y pa mi no por ta di e incinerator.

Un incinerator cu ta un “miskoop”, cu no ta funciona, y cu ta hole na corupcion.

 

Tambe sr. Arends kier bin bisa cu nunca tabata tin un plan integral pa un solucion duradero y sostenibel pa e problema di desperdicio! Wel sr. Arends mi no sa ken bo kier defende aki, pero bo por puntra e director di DNM, cu bo a core saca potret cune, pa e duna bo e documento cu e MES a yuda traha. E tempo ey e director tabata bisa cu e bandera di Aruba so  e tabata sirbi. Den e plan integral ey e WasteAwayplant di Bouldin & Lawson tabata forma parti, cu esun cu bo ta pone man riba su cabes esta Otmar a yuda boycotea y percura pa desmantela esaki, pa haya espacio pa hinca e incenirator chikito (porkeria) aden. Esaki no ta storia pero historia. (FACT). No solamente ta keda hiba un maneho ad-hoc, manera cu ta sosode den e caso di WEB y SETAR, pero ta sigui trata na tapa solo cu un dede, pasobra NOS a para bira mas NAN cu NAN mes. Ta ignora e corupcion cu a tuma lugar cu e incinerator chikito y awor kier hasta ignora esnan cu a denuncia falta di maneho cu dump, entre otro door di e partner den coalicion den persona di e Prome-Minister. Y esaki sigur lo no trece solucion, al contrario esaki lo haci bo parti di e problema! Ni cuanto bo purba di desvia e atencion, e FACT aki lo sigui persigui bo. Awor ta e momento pa bo demonstra cu “BO NO TA NAN”!

 

Parce cu e stul di minister ta basta comodo, pasobra sr. Arends ya caba a acepta cu su partido no tin nada di bisa den e gobernacion actual. RAIZ liher a prefera di asumi e rol di marioneta, guli manda abou loke e Prome Minister bisa y manda, y recuri na gañamento pa proteha esun cu ta dirigi gobierno keto bay. Un prueba palpabel ta con RAIZ for di un inicio a bay di acuerdo pa acepta un “REST-PAKKET “!

 

Miembro di Partido UPP

Booshi Wever