Hues a dicta sentencia den e caso di asesinato di e hoben Lisander “Sami” Ignacio. Tur 4 sospechoso a keda condena y a ricibi nan castigo.
Oranjestad:
Diabierna mainta Hues a dicta sentencia den e caso di asesinato di e hoben Sami Ignacio. E cuater sospechosonan a wordo haya culpabel y a keda sentencia.
Hues a splica cu riba 30 Juli 2019, Brandon tabata sinta na e basketball court na Village, un gang a pasa tira riba dje, cu e consecuencia cu Brandon a keda lam. Brandon, despues cu e mes no por a tuma revancha, e la apunta algun di su gang membernan pa tuma revancha p’e.
Riba 15 di januari 2021 den oranan di anochi, nan a tira Lisander “Sami” Ignacio mata, esaki a sosode na momento cu e tabata sinta den su auto. Sami a ricibi dos tiro den cabes y a fayece.
Wuill Vrolijk a declara na polis cu Brandon a bis’e, cu e mester bay bisti na preto, pasobra nan mester bay regla cuenta. Nan a bisa Vrolijk pa busca Yael Frans y despues nan ta bay Pos Chiquito. Brandon a bisa cu nan ta bay spanta un hende.
Ora nan a yega Pos Chikito, Yael Frans a mira Yoshua Wouters cu un arma den su man. Nan a keda warda den un cas bou construccion y ora un auto blanco a pasa, nan a bay na e cas. Yoshua bay cerca di auto y nan a mira con Yoshua a los tiro. Nan tur tres a core bay. Segun Hues tin testigo cu a bisa cu nan a scucha tiro y a mira tres hende core bay.
Hues ta haya cu ta legalmente prueba cu Yoshua a tira Sami mata. Esey a mustra cu Yoshua a kita bida di un persona na un forma hopi laf, e la causa hopi dolor na un famia, e la causa hopi inseguridad y miedo den comunidad.
Brandon ta complice pasobra e tabata kier e venganza y tabata pidi diferente hende pa pone algo bek p’e pasobra e la keda lam.
Wuill Vrolijk aunke tabata presente ora Sami a wordo mata, su intencion tabata pa dirigi un pelea den grupo.
Yeal Frans su intencion tabata menasa cu arma.
Hues a condena Yoshua y Brandon Wouters cu 18 anja di castigo di prison.
Wuill Vrolijk sentencia cu 18 luna di castigo di prison y Yael Frans cu 15 luna di castigo di prison.
E demanda di e mama di Sami mas di 41 mil florin. E parti di alimentacion no a keda prueba, pero si a keda pruueba algo mas di 20 mil florin, cu tambe mester wordo paga.
Tur 4 ta responsabel pa paga e demandanan aki. Hues a pone medida di pago mesora.