Home » Team Refresca Memoria: Algun medida cu a wordo tuma riba lomba di pueblo, despues di a derocha e fondonan social

Team Refresca Memoria: Algun medida cu a wordo tuma riba lomba di pueblo, despues di a derocha e fondonan social

by Admin
0 comment 104 views

Actualmente mundo incluyendo Aruba ta pasando den su peor momentonan, mundo ta den un pandemia, cu a crea un chaos, un crisis economico y financiero.

No a keda nada otro cu gobiernonan di tur pais incluyendo Aruba mester a haci varios ahustacion y fianza. Esakinan tabata necesario pa e pais por a sigui funciona.

Aruba mester a bay presta placa cerca madre patria Hulanda. E fianzanan cu Aruba a haya di Hulanda a bin cu condicionnan cu gobierno di Aruba mester mantene su mes na nan.

Di otro banda no por lubida e medidanan cu Gabinete Mike Eman a implementa den temponan hopi miho, cu nos no tabata den niun crisis, e medidanan aki a wordo tuma djis pa asina nan por a sigui malgasta fondonan publico.

E gobierno di AVP a yena e aparato gubernamental cu un cantidad di votado, amigo y famia, cu te awe varios ta ocupa posicionnan strategico den gobierno.

Esaki a haci cu Gobierno actual sigur no por tuma mas hende den servicio, cu excepcion di HBO’er of W.O’er dus hendenan cu un educacion mas avansa y tambe e unico dienstennan cu ta wordo permiti pa hende den servicio ta Polis, brandweer, Douane etc.. pero esnan cu aplica mester pasa varios test prome cu nan por drenta den servicio. Gabinete Wever Croes compara cu Gabinete Mike Eman tin hopi menos hende trahando na nan ministerionan.

Ta prohibi pa lubida e medidanan aki cu a wordo tuma pa Gabinete Mike Eman 2009-2017, den un temporada cu no tabata tin pandemia y cu bendicion di e sindicatonan na Aruba, cu niun dia a tene cuenta cu e pensionadonan, e ambtenaarnan, e pagadonan di belasting cu a bay hopi atras. Awo cu no tin otro salida, ayuda pa algun media, nan kier causa un disturbio, door di ta pasa instiga pueblo pa lanta, lubidando con Mike Eman a pasa e pueblo e siguiente medidanan, ayuda pa algun media y lider sindical di e tempo ey:

Medidanan den SVB
1) A aumenta e prima di AOV cu 1% entrante 1 di januari 2014,
2) A aumenta e prima di AOV cu 1% mas entrante 1 di januari 2015,
3) A individualisa e prima di AOV pa parehanan casa. Consecuentemente e parehanan aki tur aña ta perde di haya un suma di 4000, 5000 y te hasta mas cu 6000 florin di restitucion di AOV,
4) Den forma abrupto a aumenta e edad di pensioen di viehez di 60 te 65 aña. Cu e amento aki un pensionado soltero durante 5 aña ta entrega un suma di Af. 63420,00 y pa parehanan casa nan ta entrega un suma astronomico di Af. 106800,00 den e fondo di SVB.

Sinembargo despues cu Gabinete Eman a suta e participanten di e fondo di SVB cu tur e medidanan menciona, na December 2014 sin ningun tiki di escrupulo nan a exonera nan mes di un debe di 58 miyon florin di prima di AOV cu nan no a traspasa pa SVB.

Medidanan den APFA
Pa loke ta e fondonan di APFA, Gabinete Eman a impone e siguiente medidanan riba lomba di e participantenan di APFA:
1) Den forma abrupto a aumenta e edad di pensioen di ambtenaarnan te 65 aña. Aki tambe e pensionadonan lo perde di haya un suma substancial di nan pensioen y cual suma lo keda den fondo di APFA,
2) A aplica franchise y middelloonregeling y consecuencia di esey ta cu e participantenan lo haya un reduccion den nan suma di pensioen y cu ta bay directamente den caha di APFA,
3) A reduci e Duurtetoeslag di e ambtenaarnan for di 36.1% te cu 17.7%, consecuentemente ora cu e ambtenaarnan bay cu pensioen nan lo bay sinti un reduccion substancial di nan pensioen y cual suma tambe lo keda den caha di APFA,
4) E franchise a ser aumenta for di 14059 florin te cu 17616 florin y e porcentahe di acumulacion di pensioen a ser baha di 2.15% te cu 1.75%. Pues aki tambe mas placa lo keda den fondo di APFA y e empleado publico cu awe ta entrega mas lo haya menos den futuro.

Cu hopi fanfaria Gabinete Eman recientemente a anuncia cu nan a hinca 170 miyon florin den APFA y p’asina yega na un porcentahe di cobertura di 100%. Pero aki tambe nan kier manipula mente di pueblo, ya cu e suma di 170 miyon florin nan a fia for di e propio APFA y pa APFA hinca esaki bek den su fondo.

Finalmente Gabinete Mike Eman a bolbe crea un debe di 170 miyon florin extra cerca APFA y pa cual henter comunidad ta pagando e debe aki.

Medidanan den AZV
Pa loke ta e fondonan di AZV, Gabinete Eman a impone e siguiente medidanan djis pa haya mas placa pa malgasta cu amigonan y famia:
1) A aumenta e prima di AZV cu 1% entrante 1 di januari 2011,
2) A aumenta e BBO cu 1% pa AZV (Health Tax) entrante 1 di december 2014,
3) A aumenta e BBO cu 1½% pa AZV (Health Tax) entrante 1 di juli 2015,

Asina nos por mira cu e participantenan den SVB, APFA y AZV mes mester a sangra, debi na e gran cantidad di medidanan cu a ser poni riba nan lomba. Locual nan no a conta pueblo ta cu semper den nan gobernacion, den forma iresponsabel nan no tabata traspasa e fondonan di primanan di AOV, AZV y APFA cu ta ser reteni di e trahadornan, manera por ehempel na 2001 cu nan a laga un debe atras di 270 miyon florin den APFA.

No laganan cu ayudo di nan medianan comprometi instigabo, mandabo haci algo cu mayan lo por tin consecuencianan serio pa bo. Sea conciente, NO bay tras di instigacionnan,

Atentamente Team Refresca Memoria

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio