Rotterdam, Hulanda-
Polis di Rotterdam a parti potret y video di e persona cu ta wordo busca, pa un caso di atraco arma, cu a caba den un persecusion y tiramento fatal, den cual e hoben Roncherello Ellis (20) a perde su bida.
https://www.youtube.com/watch?v=mKBlnJNljVA&t=308s
Roncherello Ellis (20) a wordo tira den careda di 10’or y mey di anochi, riba dialuna 11 di oktober 2021. E la wordo tira den Schiltmanstraat y a keda seriamente herida. Su amigonan mesora a core hibe Ikazia Ziekenhuis, pero lamentabelmente un rato despues e la fayece. Polis mesora a cuminsa cu un investigacion intensivo.
Tur cos a cuminsa riba e anochi aki, na momento cu Roncherello Ellis tabata cu tres amigo mas den auto y un di su amigonan a pidi pa para un rato na un Atm machine pa asina e por lanta placa. Un auto Skoda cu 5 homber den dje, a yega para, 4 persona masculino a baha for di e auto y a atraca e amigo di Roncherello cu na e momento ey tabata lantando placa.
Despues di e atraco Roncherello y su amigonan a dicidi di sigui e auto den cual e atracadonan a huy. Durante e persecusion den e bario Bloemenhof varios tiro a cay, den cual un tiro a kibra e glas di auto y a alcansa Roncherello Ellis den su lomba cu consecuencia fatal.
Durante e persecusion aparentemente un di e atracadornan lo a yama un otro persona, probablemente lo tabata pa duna e persona instruccion pa tira riba e auto. E persona cu a tira riba e auto no tabata den e auto cu e atracadornan pero a para canto d caminda y a los varios tiro cerca di e auto, di cual un di e tironan aki a resulta fatal pa Roncherello Ellis.
Despues di varios siman di investigacion, polis a logra haya imagennan di e persona cu lo a los e tiro fatal y awo autoridad ta en busca di e persona aki.
E caso tristo aki ta sigui bou investigacion y awo cu tin e imagennan di e persona cu a los e tiro fatal, autoridad di Rotterdam a pidi cooperacion di e habitantenan di Rotterdam pa comparti e imagennan di e persona aki y si un persona sa ken e ta, of sa mas di e caso fatal aki, pa porfabor tuma contacto mas lihe cu ta posibel cu Polis pa asina por soluciona e caso tristo aki, den cual un hoben di apenas 20 aña a wordo asesina.