Botica di Servicio a organisa nan di cuater Diabetes Walk & Run riba 14 di November, oficialmente conoci manera Dia Mundial di Diabetes, un oportunidad pa haci algo activo y saludabel pa comunidad y para keto un rato riba e tema di Diabetes. E aña aki e evento tabata tin un acogida bastante grandi.
CMB ta hopi contento y orguyoso di por a contribui y participa un bes mas den e tremendo evento aki. Diabetes ta un malesa cu desafortunadamente ta presenta su mes na Aruba den cantidadnan relativamente halto. Si nos mira e cifranan di aña pasa cu IDF [Federacion Internacional di Diabetes] a presenta, a calcula esaki na 15% di e poblacion incluyendo esnan cu por ta no ta diagnostica ainda.
Sr. DeWolfe, Director General di CMB ta menciona cu tabatin mas o menos 1,000 participante e aña aki pa e di cuater edicion di CMB Diabetes Run Walk, “cual ta algo absolutamente fantastico,” Sr. DeWolfe ta expresa. CMB ta hopi orguyoso di por ta forma parti di dje, gradiciendo tur sponsor y mas importante tur e participantenan cu a contribui na un bon causa.
Pa CMB, ta semper importante pa contribui y duna bek na comunidad. Responsabilidad corporativo y social ta realmente un di e puntonan di enfoke di mas grandi di e banco, “y nos ta haya hopi importante di por ta akinan participando y formando parti di dje pa contribui na un causa hopi importante,” Sr. DeWolfe ta conclui.
E categorianan a inclui un actividad di 10km, cual a sali 5:30am y bay te na The Cove Mall, cabado bek na Botica Eagle, un otro di 5km cual a bay te na Blue Residence y caba na Botica Eagle, y finalmente pa e muchanan tabata tin uno di 1.5km, 3km, 800m, 400m y 200m.
