ORANJESTAD, ARUBA – Fundacion Parke Nacional Aruba (FPNA) ta organisa e di dos ‘Nature Photography Competition’, e competencia ta pa profesional pero tambe amateur. Cu e competencia anual aki, FPNA ta desea di captura e bunitesa unico y diverso di Aruba su balor natural, y crea concientisacion pa e conservacion di naturalesa, y no solamente den e areanan protegi maneha pa FPNA pero pa Aruba completo.
E ‘Nature Photography Competition 2021’ ta pa cuidadano di Aruba cu e tema di Aruba su Bida Marino. Nos bida marino ta uno spectacular, cu un biodiversidad increibel y un bida marino interesante cu ta digno di wordo proteha y conserva pa e future generacion por experencia. FPNA ta sugeri algun topico manera e matanan of bestianan di lama den nan habitat marino, comportacion di bestianan marino, imagen marino macro, paisahe bou awa, y ‘arte marino’. Sinembargo, cualkier potret relaciona cu bida marino cu ta conecta den un manera of otro cu Aruba su balor natural marino por wordo entrega.
Pa tur persona cu ta intersa pa siña un poco mas di fotografia marino, keda pendiente riba nos pagina di Facebook, caminda lo anuncia un workshop digital cu lo wordo facilita pa artista y fotografo talentoso, Armando Goedgedrag, dia 2 di december pa 6.30 PM pa asina aki comparti su experencia di saca potret bou di awa.
Ultimo dia pa entrega potret pa e ‘Nature Photography Competition 2021’ ta dia 31 di december. Potretnan lo wordo analisa door di un panel di hurado reconosi cu conosemente di e bida marino y arte tambe representante di Post Aruba y FPNA. E premionan ta inclui efectivo, exhibicion di e potretnan ganador door di FPNA, e potret ganadornan lo wordo comberti den un edicion special di stampia cortesia di Post Aruba.
Pa mas informacion riba e reglanan di participacion pa e ‘Nature Photography Competition 2021’ y e workshop digital di Armando Goedgedrag por bishita e pagina di Facebook: Aruba National Park Foundation, website www.arubanationalpark.org, of email na [email protected]
