ORANJESTAD – E homber Venezolano A.L. a presenta den sala di Corte pa e caso penal cu Ministerio Publico a cuminsa contra dje.
Aruba Native por a compronde cu A.L. ta un residivista. Na 2020 el a wordo condena na 4 aña di prison pa traficacion di hende. E traficacion aki tabata tragico pasobra varios persona a muri ora cu mester a bula na awa pa yega tera.
Awor e mester a responde pa traficacion di un cantidad di hende na Santana di Cacho.
Hues a puntra A.L. si el a trafica hende. Segun A.L. e tabata un ilegal riba e boto pero no a trafica hende. El a bisa Hues cu den pasado el a yega trece ilegal y pesey e ta sera actualmente den KIA. Hues a bisa cu for di e relato di Polis, 11 April 2021 a drenta un boto cu ilegal mas o menos 10’or di anochi. A manda patruya Seroe Colorado caminda Guarda Costa a haya un ilegal banda di e anker grandi na Colony. Segun miembronan di Guarda Costa, e homber aki A.L. tabata riba un boto hunto cu 15 persona cu a yega na santana di cacho.
A haci investigacion y a haya e boto ArcAngel na Baby Beach. A logra gara 10 persona, 7 homber y 3 muher cu tabata scondi den mondi. Un dama ilegal a declara cu ora a yega na Baby Beach nan a wordo bisa pa bula na awa y el a hera hoga. Segun e dama nan tabata 15 persona abordo.
El a reconoce A.L. riba un di e potretnan como e persona cu tabata navega e boto. E tabata cambia cu un otro. El a bisa tambe cu A.L. a yega di cay sera caba pa traficacion di hende. El a bisa cu e ta kere cu A.L. ta doño di e boto, no tabatin salba bida, no tabatin luz. Segun A.L., 5 of 6 no tabatin salba bida bisti. E otronan si. El a bisa cu tur hende mester a bin cu su salba bida. Segun A.L., dos primo Carasquero tabata encarga cu e boto y nan tabata sera den e mesun cel cun’e y nan a wordo laga liber. Hues a bisa cu tin declaracion Carasquero kende a bisa cu nan tabata 16 persona abordo y no tabatin luz, no GPS y no sa kende tabata navega e boto.
Hues a mustra cu den 2020, A.L. a wordo condena na 4 aña di prison pa traficacion di hende. Tabatin hendenan cu a muri durante e traficacion aki. Un aña despues A.L. atrobe deteni.
FISCAL
Fiscal a bisa cu tin dos persona a declara cu ta A.L. ta e capitan di e boto. Fiscal a señala cu e boto no tabatin luz, no GPS, no suficiente salba bida. E ta haya cu a pone bida di e 15 – 16 hendenan abordo na peliger. E boto no tabata capacita pa transporta asina hopi hende. Danki Dios no tabatin morto. Den pasado si esey a sosode. Hopi hende ta tuma riesgo di cruza laman pa bin busca un mihor bida na Aruba. E trecemento di ilegal no solamente ta viola e ilegalidad sino ta causa hopi trahador ilegal riba Aruba. Fiscal ta haya cu A.L. a yuda cu esaki. E ta considera A.L. como residivista. El a remarca cu apenas A.L. a wordo condena na 4 aña di prison y atrobe e ta organiza traficacion di hende. Fiscal a exigi 1 aña y 8 luna di prison.
DECISION HUES
Hues a sera tratamento di e caso y dicta sentencia di biaha. Hues ta haya cu A.L. a trece mas cu 12 hende den un boto Aruba. Hues a bisa cu e ta confia den declaracion di e dos personanan, kendenan a bisa cu ta A.L. ta e capitan. El a mustra cu e boto no tabatin luz, no tabatin GPS y no ta tur hende tabatin salba bida. Hues a bisa cu e ta tene cuenta cu A.L. ta un residivista y ta mas cu 12 hende ilegal el a trece Aruba. Hues a confirma exigencia di Fiscal y a condena A.L. na 1 aña y 8 luna di prison.