Home Politics Minister Rocco Tjon: RIBA DIA INTERNACIONAL DI DERECHO DI MUCHA A MARCHA...

Minister Rocco Tjon: RIBA DIA INTERNACIONAL DI DERECHO DI MUCHA A MARCHA HUNTO PA TRECE CONSCIENTISACION

SHARE

ORANJESTAD – Diasabra mainta, durante dia internacional di Derecho di Mucha, Minister di Husiticia y Asuntonan Social Sr. Rocco Tjon hunto cu coleganan Minister President Sra. Evelyn Wever-Croes y Minister di Enseñansa y Deporte Sr. Endy Croes a uni na e marcha titula “Marcha pa nos Derecho” pa asina trece conscientisacion como tambe enfatisa e importancia di e derechonan fundamental di cada mucha y hoben na Aruba y rond mundo.

Riba “Dia Internacional Di Derecho Di Mucha” e Mandatarionan a marcha hunto cu e muchanan di e scolnan basico cu a participa pa nan derechonan. E dia aki a wordo celebra den loke ta e “Siman di Lantamento di Mucha” cual a wordo introduci na Aruba na aña 2018. Gobierno a scohe e siman aki en conexion cu dia Internacional di Derecho di Mucha. Aruba a uni su mes na e fiesta mundial aki unda cu mundo henter a para keto na e momento historico cu a tuma lugar 32 aña pasa, caminda lidernan mundial a yega na un acuerdo den un asamblea general di Nacionnan Uni cu globalmente lo proteha e bienestar di cada mucha pa medio di e Tratado di Derecho di Mucha.

Na aña 2001 Aruba tambe a firma e tratado di Nacionnan Uni, haciendo un compromiso pa proteha, di un forma mas completo posibel, tur mucha pa medio di e diferente articulonan specifica den e dos tratadonan. Na mes momento Aruba a forma un comision pa trata esaki, cual ta consisti di tur representantenan di e diferente fundacionnan na Aruba cu ta traha pa percura cu tur e derechonan haya e balor necesario. Durante e marcha por a mira diferente borchi cu 40 di e 54 articulonan cu ta delinea exactamente kico ta derechonan di cada mucha. Cada fundacion cu ta parti di e comision aki tambe tawata tey presente pa asina brinda informacion na tur esnan presente.

Por ultimo, e Mandatario a duna un danki na tur e scolnan, muchanan, fundacionnan y coleganan cu a lanta mainta trempan pa asina participa activamente na e marcha aki. Tambe a duna un danki na tur e fundacionnan cu ta traha duro y incansablemente pa brinda e atencion debido na tur e derechonan di mucha.