En conexion cu dia internacional di mucha, bunita actividad a keda presenta den Caya Betico Croes y riba Plaza Padu
ORANJESTAD: Diasabra ultimo Minister Endy Croes hunto cu colega Minister di Husticia y Asuntonan Social sr. Rocco Tjon y Minister Presidente sra. Evelyn Wever Croes a participa na e marcha di derechonan di mucha cu a tuma luga den Caya Betico Croes. E marcha a sali for di Djiespi’s Place pasa den caya grandi y termina na Plaza Padu. Un mainta yena cu canto, baile, informacion y actividadnan popular pa e muchanan.
E meta di actividad aki tabata marcha pa e derecho fundamental di cada mucha y hoben na Aruba y rond mundo y conscientisa henter e comunidad riba e derecho di mucha.
Un grupo di muchanan hopi contento a marcha cu musica y borchinan colorido y riba cada borchi tabatin skirbi un di e derechonan di mucha.
‘Nos ta hopi contento pa por celebra e dia aki cu e muchanan. E dia internacional di derecho di mucha di pa conscientisa comunidad riba e derecho cu cada mucha tin. Mucha tin derecho na enseñansa mas cu claro nos ta para pa esey mescos cu e SDG 4 di e metanan mundial 2030 cu ta papia di calidad di enseñansa, esey ta obligacion di nos y mas cu claro’ e Mandatario a enfatisa.
Minister Endy Croes a sigui bisa; mescos cu boso tin e drecho na enseñansa di calidad cual ta nos obligacion pa percura pa esey boso tin e responsabilidad como mucha pa traha boso huiswerk, y educa boso mes y nos lo percura pa e detayesnan. Asina nos lo percura pa forma un miho ciudadano pa e comunidad di Aruba.
Alabes e Mandatario ta felicita e comision organisado di e bunita evento, tambe ta gradici tur e mayornan, docentenan cu a lanta tempran pa compaña e muchanan, IBISA, Cuerpo Policial Aruba y tur cu a aporta pa haci e dia aki uno exitoso yena cu alegria pa nos muchanan.
