Home Local A.T.A. CEO Ronella Croes: Vuelo inaugural di Frontier Airlines ta refleha...

A.T.A. CEO Ronella Croes: Vuelo inaugural di Frontier Airlines ta refleha transicion di recuperacion continuo y stabil

SHARE

 

 

 

Diasabra atardi na Aeropuerto Internacional Reina Beatrix a tuma luga e celebracion di e yegada di e vuelo inaugural di Frontier Airlines for di Miami. E itinerario nobo di Frontier, un vuelo directo “ida y vuelta” entre Aruba y Miami tur diasabra atardi, a wordo ricibi cu hopi entusiasmo y positivismo pa partnernan den e industria di turismo.  

  

Representantenan di Aruba Tourism Authority (A.T.A.), Aruba Airport Authority N.V. (AAA N.V.) y Aruba Hotel & Tourism Association (AHATA) tabata presente pa brinda un caluroso bonbini na pasaheronan y representantenan di Frontier Airlines. 

  

CEO di Aruba Tourism Authority (A.T.A.) Ronella Croes a expresa “Nos fase di recuperacion continuo y stabil ta transicionando pa un fase nobo di crecemento, y nos ta gradici Frontier Airlines pa nan confiansa den Aruba…Ocacionnan manera esaki ta bisa algo importante di e resiliencia di Aruba durante di un periodo di retonan di nivelnan historico pa e industria di biahe y turismo mundialmente.”  

  

Aruba Tourism Authority ta orguyoso di e desaroyo beneficioso aki cu ta contribui na e recuperacion continuo di turismo, pero tambe na e metanan pa cu cuido di medio ambiente y sostenibilidad. Frontier Airlines ta conoci como un aerolinea cu ta ofrece prijsnan di ticket hopi competitivo y un calidad di servicio excelente, combina cu e mision medio ambiental pa bira “America’s Greenest Airline”, esta pa ta e aerolinea lider riba tereno di sostenibilidad di medio ambiente.  

  

“E esfuersonan di Frontier pa reduci nan “carbon footprint” pa sigura un mundo mas limpi ta cuadra tambe cu Aruba su metanan pa trece conscientisacion y educacion na publico,” e CEO di A.T.A. a comenta.  

  

Frontier Airlines, cu su oficinanan principal na Denver, Colorado, tin mas di 100 avion A320, y tin e flota mas grandi di Airbus A320neo na Estadonan Uni di Merca. E aerolinea ta bula pa destinacionnan na Norte America, Caribe, Mexico y Centro America. Pa medio di e vuelo cu lo tuma luga entre Aruba y Miami International Airport, nos isla lo keda conecta cu mas di 100 destinacion den ful e continente Americano pa medio di e conexionnan ofreci na MIA.  

  

Aruba ta encurasha y positivo pa cu desaroyonan riba tereno di turismo, surpasando tur proyeccion di recuperacion. A.T.A. ta contento pa brinda bonbini na e contribucion di Frontier Airlines na e recuperacion cu nos isla ta logrando pa medio di entre otro strategianan di mercadeo bon defini y accionnan proactivo.  

  

Inicialmente proyeccionnan pa 2021 tabata pa yega entre 45 pa 60% di e cantidad di bishitantenan compara cu 2019 cu ta e aña pre-pandemico, pero ta surpasando tur expectativa. E proyeccion di recuperacion pa fin di 2021 ta actualmente 73%. Siguiendo e desaroyo actual, Aruba ta proyecta un recuperacion di 95% di e total di bishitante di tur destinacion pa fin di 2022.  

 

Croes a conclui bisando cu e recuperacion continuo y impresionante di Aruba su industria ta un “refleho di diferente factor, pero sin cualkier duda ta refleha e determinacion di tanto e sector publico como di e sector priva, como tambe di nos comunidad completo. Aruba ta gradici biaheronan cu a y ta brindando sosten na e isla durante di temponan extremadamente dificil pa biahe internacional; y nos recuperacion por wordo atribui completamente na e rendimento di e mercado Mericano.”  

  

E recuperacion continuo impresionante di e segmento di turismo principal pa nos isla, esta Estadonan Uni di Merca, ta conduci na e proyeccion di un recuperacion di e mercado aki so di 100% pa fin di 2022 caba, y ta considera Frontier Airlines un partner importante den e proceso pa logra esaki. 

 

Como un gesto di reconocimento y un simbolo di e conexion entre Frontier Airlines y Aruba su esfuersonan di conservacion y sostenibilidad, Ronella Croes a presenta un pintura di un prikichi di artista local Armando Goedgedrag na ehecutivonan di e aerolinea. A scoge pa e piesa impresionante di nos Parha Nacional stima, un parha endemico cu ta na riesgo, cu colornan vibrante y un personalidad colorido. “Aruba lo ta honra di por wak e pintura aki di un prikichi, cu nos a duna e nomber “Kiki”, bulando cu Frontier, decorando e rabo di un di e jetnan di Frontier Airlines”, el a agrega.