Home Corte Traficacion di damanan prostituta pa traha ilegal na Aruba trata den Corte

Traficacion di damanan prostituta pa traha ilegal na Aruba trata den Corte

SHARE

ORANJESTAD – Corte di Husticia a trata e caso penal cu Ministerio Publico a cuminsa contra e damanan C.B.(Mami), M.P. y e homber H.F.

Aruba Native por a compronde cu e trio aki ta wordo sospecha di traficacion di damanan di Colombia pa traha den e bar di Mami. Ta henter un operaicon tabatin y Fiscal a exigi entre 3 luna y 2 aña di prison.

E acusacion cu Fiscal a presenta contra e damanan Colombiano biba na Aruba C.B. y M.P., ta cu entre Mei 2019 y Juni 2020, nan a percura pa 12 dama di Colombia drenta Aruba. E homber H.F. ta wordo acusa di traficacion di hende entre 10 Juli 2018 pa 2 November 2019, caminda el a yuda 8 dama drenta Aruba.

Hues a mustra cu C.B. ta doño di un club nocturno. Dia 20 Januari 2019 Warda Costa a tene control na e bar. Tres dama a declara cu nan tabata tene relacion sexual pa pago y ta huur camber for C.B. Hues a mustra cu na 2019 info a drenta informacion cu tin prostitucion ilegal na e club nocturno di C.B. Tambe a haya informacion cu na Driemasterstraat un auto tabata baha muhernan pa haci prostitucion.

PERCURA PA DAMANAN YEGA ARUBA

Un dama B.C. di Colombia a declara con henter e operacion di Mami ta. El a bisa cu Mami tabata pidi e damanan di Colombia nan potret den bikini pa e mira nan curpa. Si e aproba nan, e ta percura pa pasashi y reservacion di hotel pa nan na Aruba. Na aeropuerto Mami tabatin un persona cu ta duna e damanan placa pa asina ora nan yega Inmigracion nan wordo admiti pa drenta Aruba. E damanan sa di adelanta cu nan tin cu traha den e bar y bende nan curpa. Mami tabata duna e homber H.F. e placanan pa duna e damanan. E tabata duna e damanan entre 1000 y 1500 florin. H.F. tabata traha na General Aviation y tabata facil pa e drenta den aeropuerto y tabata duna e damanan e placa. E tabata haya potret adelanta con e damanan ta bin bisti.

Mami tabata instrui e damanan con nan mester papia na Inmigracion. E dama M.P. tabata splica e damanan tocante con mester haci reservacion na aeropuerto di Colombia y pa print nan ticket di vuelo y reservacion di hotel pa asina mustra na Inmigracion na Aruba.

Mami a splica cu el a huur un cas den Driemasterstraat y tabata huur e cas cu dos dama. E prijs tabata inclui cu nan ta haya cuminda. E damanan tabata traha den e bar di Mami y tabata haya comision ora nan ta bebe cu clientenan. Ariba e bar tin 2 camber caminda e damanan tabata haci prostitucion. Mami tabata cobra 25 florin pa cada vez cu usa un camber.

Fiscal ta haya legalmente proba cu C.B.(Mami) a regla pa 12 dama di Colombia drenta Aruba y keda traha ilegal. Tambe cu e prima di Mami, M.P. a yuda den esaki. Fiscal ta haya e homber H.F. a yuda Mami den su plan pa laga ilegalnan drenta, door di duna nan placa pa asina demostra na Inmigracion cu nan tin placa pa estadia.

Fiscal a exigi 2 aña di prison pa Mami, 15 luna di prison pa M.P. y 3 luna di prison pa H.F. Tambe el a exigi pa H.F. 120 ora di trabao comunitario y si e no cumpli cu esaki, e lo mester bay 60 dia sera den KIA. Esaki ta nifica cu H.F. no mester bay bek KIA ya cu el a sinta caba 3 luna. Hues a bisa cu e ta bay studia e caso y otro luna lo por spera sentencia.