Djasabra awor nos ta selebrá un hubileo di oro úniko. Oro òf mihó bisa mantené algu durante 50 aña. Un logro grandi sigur, ku ta sosede ku regularidat. Hopi ta selebrá 50 aña komprometé, di matrimonio, divorsio òf traha pa e mes un kompania.
Awor di kon úniko?
Úniko pasobra e ta un aniversario di 50 aña den medio, komunikashon i mundu di entretenimiento. Nos ta referí aki na un negoshi super traishonero. Kaminda un persona ta ser midí pa su último presentashon òf programa. I hopi biaha e televidente kièr mira kara nobo, kontenido inovativo, eventunan espektakular òf un dokumental na un nivel altu.
Presentadó Sonja Barends a logra un karera di 40 aña na Hulanda.
Mavis Albertina ta presentá ya pa 50 aña i ainda e públiko ta disfrutá di dje.
Kon el a logra esaki?
Dor di ta inovativo i semper tuma e inisiativa: den un mundu oudiovisual dominá pa hende hòmber el a logra kombertí su mes den e promé produktor i presentadó femenino na televishon. Promé ku apénas e televidente tabata konosé e palabra novela, ya el a traha su promé na papiamentu.
Promé ku promotornan por a krea eventonan grandi, ya e tabata organisá su Music Festival of Golden Artists i Curaçao Christmas Collection.
Dor di di su orientashon internashonal: Mavis a laga su stèmpel den dos diferente Kontinente; na tur e Paisnan den Reino Hulandes, i tambe na Sto. Domingo, Venezuela, Puerto Rico i Miami.
Dor di ta vèrsá riba diferente tereno i super kreativo: tantu na televishon, den komunikashon, entretenimiento, evento, dokumental, pelíkula, training i edukashon, scouting, teakwondo, sambuyá, Komishon Inougurashon Nashonal- i Weganan di Rei.
Dor di ta Inkansabel i un poko tèrko: ‘No Por’ no ta forma parti di su dikshonario. Nada di arogansha, simplemente e sa kiko su abilidatnan ta i ta semper habrí pa sigui siña. E ta un persona ku hopi empatía i interes sinsero pa sa kiko ta biba den nos komunidat. Mavis a demonstrá esaki bários biaha ku su fundashon sosial i kanal di televishon, kual nan meta ta informá, stimulá, aktivá, guiá i empoderá siudadanonan den nos sosiedat.
Dor di no tin niun tiki miedu di reto: prueba di esaki ta su ‘get it done challenge’, ku ya a yuda traha henter un dak di edifisio na Internat Sta. Rosa.
Dor di stima su trabou i gusta kompartí su konosementu: Mavis ta un fuente di informashon pa tur esnan ku ta kuminsá den medio i komunikashon i un sosten pa esnan ya establesé. Mavis a krea su propio kurso pa forma hóbennan interesá den medio i komunikashon i logra siña hopi ku awe ta laborá na bários kompania oudiovisual na Kòrsou.
E liña kòrá di su karera ta: MAVIS TA PONE KOS SOSEDE. For di un idea te su realisashon.
Ta esei ta hasi su aniversario úniko i ta esei ta hasi Mavis úniko!
Djasabra 20 di novèmber nos ta selebrá ku hopi entusiasmo i wak bek ku orguyo i gratitut riba:
5 DESENIA
50 AÑA
600 LUNA
2.609 SIMAN
18.262 DIA
438.291 ORA
26.297.438 MINÜT
1.577.846.300 SEKÒNDE
Nos Pais Television i Tele Aruba, lo transmití e selebrashon BIBU i direkto entre 7’or pa 10’or di anochi.