Pa di 4 aña ta organisa e siman aki cu tin como meta pa pone enfasis riba derechonan di mucha y e 6 puntonan basico di con pa lanta un mucha
Oranjestad Aruba. Durante un conferencia di prensa na Centro pa Hoben y Famia, minister di Asuntonan Social y Husticia Sr. Rocco Tjon y representantenan di e Comicion Vision Pedagogico a duna inicio na e di 4 edicion di e Siman di Lantamento di Mucha. E anja aki esaki lo tuma lugar cuminsando 18 di november te cu 2 di december 2021.
E idea pa e siman aki a bin, na momento cu e Taskforce di Reino di Derechonan di Mucha a keda instala na 2014. E Taskforce aki ta consisti di un representante di cada isla den Reino. Den e plan di trabou di e Taskforce aki a delinea algun temanan cu lo atende cune di un forma colectivo. Un di e temanan cu sigur e Taskforce kier promove, den bienestar di e muchanan, ta e tema di Lantamento di Mucha riba un forma positivo. Pa e motibo aki a sugeri na cada isla pa desaroya un vision pedagogico pa nan isla y tambe pa introduci un siman di concientisacion tocante e tema di Lantamento di Mucha.
Na 2016 Aruba a forma un comision Vision Pedagogico cu e meta pa formula y promove e Vision Pedagogico na Aruba. E comision aki ta consisti di 5 diferente organisacion: Directie Sociale Zaken, Fundacion Pa Nos Muchanan, Stg. Wit Gele Kruis Aruba, Fundacion Respeta Mi y Tienda di Educacion. E organisacionnan aki conhuntamente cu Fundacion ADRA y FADA tambe forma parti di e Centro pa Hoben y Famia unda nan ta ofreciendo diferente servicionan na e famianan di Aruba bou di un solo dak.
Desde 2018 a introduci na Aruba e Siman di Lantamento di Mucha. Gobierno a scohe e siman aki door cu e ta inclui e fecha 20 di november cu ta “Dia Internacional di Derecho di Mucha”. Aruba ta uni su mes na e causa aki y ta enfatisa riba e importancia di lanta nos muchanan den un ambiente di amor y siguridad. Durante e siman aki lo tin diferente actividad, tanto pa mayor como pa mucha. E calendario di actividad ta posibel danki na e diferente organisacionnan cu ta promove e vision pedagogico y e derechonan di mucha na Aruba.
Ariba e fecha di awe 18 di november e Centro pa Hoben y Famia ta celebra cu un aña pasa e la habri su portanan oficial y ta agradecido na henter e comunidad di Aruba pa a brinda nan e sosten cu nan a ricibi te awo. Sociaal Crisisplan ta mira e importancia den e trabou esencial cu e Centro pa Hoben y Famia ta haci y ta yuda cu fondo pa haci e projecto aki posibel.
Ta importante pa nos muchanan y nan famia ta na altura di derechonan di mucha y e 6 puntonan basico pa cada mayor por lanta nan yiu den un hogar cu amor, cariño y respet. E siguridad y bienestar di nos mucha- y hobennan ta responsibilidad di nos tur.