A.T.A. Europa a ricibi e noticia grato cu e agencia VING di Suecia a pone Aruba riba nan itinerario pa e temporada di winter 2022/2023. E vuelo inaugural, directo entre e capital Stockholm y Aruba, ta programa pa dia 24 di november 2022, y lo tin un buelo cada dos siman.
Aruba Tourism Authority (A.T.A.) ta contento cu e decision di parti di Nordic Leisure Travel Group AB, cu a wordo anuncia dia 17 di november pa e compania durante di e lansamento di nan itinerario pa winter 2022/2023 cu un total di 9 vuelo. Ta calcula cu nos isla lo ricibi 3.357 bishitante for di Suecia cu VING durante di e temporada di cuater luna. E ultimo vuelo ta programa pa dia 16 di maart, 2023.
“Demanda pa Aruba for di e mercado Europeo ta creciendo y e vuelo directo for di Suecia ta parti di e strategia pa sigui diversifica e flujo di turismo pa Aruba,” Tirso Tromp, Area Director A.T.A. Europa a splica. El a agrega, “Despues di un ausencia di dos aña VING a dicidi cu nan kier bolbe Aruba. Esaki ta debi na e hecho cu den pasado nos isla semper tabata un di e destinacionnan miho bendi y, ademas, e evaluacionnan di nan clientenan despues cu nan bishita ta hopi faborabel, semper a conta cu e gradonan di aprobacion y satisfaccion mas halto.”
Claes Pellvik, Head of Communication pa Nordic Travel Leisure Group AB a expresa: “Nordic Leisure Travel Group ta contento pa bolbe Aruba atrobe cu vuelonan “non-stop” entre Stockholm y Aruba pa e temporada di winter 2022/2023, particularmente pasobra e feedback di nos clientenan pa cu nos programa di Aruba semper tabata excelente. Nos ta wak Aruba como un destinacion cu ta posiciona perfecto pa futuro, cu su enfoke riba bienestar, sostenibilidad, su naturalesa fantastico, ofertanan di productonan hotelero fantastico y su hospitalidad fabuloso.”
Representantenan di e compania a laga sa cu e intencion tabata pa cuminsa bula pa Aruba na 2022 prome cu e fecha menciona, pero nan kier a warda pa e entrega di nan Airbus nobo di parti di Boeing pa efectua e vuelonan cu e avion aki.
A.T.A. ta sumamente contento cu VING lo bula pa Aruba cu un Airbus A330-900neo nobo nobo cu 373 stoel den 3 categoria. E avion aki ta haci uzo di menos combustibel y ta aporta na sostenibilidad, algo cu ta hopi importante pa A.T.A. y Aruba. Claes Pellvik a conclui: “Loke ta nobo ta cu nos lo bula e vuelonan aki cu e Airbus A330-900neo di nos mesun Sunclass Airlines. E avion “state of the art” tin un emision reduci di CO2 di 23%, y ademas ta provee un miho experiencia pa e pasahero.”
###